އިންޑިއާއަކީ ރާއްޖެއަށް އެންމެ ގާތް އެއް ގައުމު: ރައީސް މުޢިއްޒު

އިންޑިއާއަކީ ރާއްޖެއަށް އެހީ ބޭނުންވާ ކޮންމެ ވަގުތެއްގައި އެހީތެރިކަން ފޯރުކޮށްދޭ އެންމެ ގާތް އެއް ގައުމުކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ

އެމަނިކުފާނު މިފަދައިން ވިދާޅުވެފައި ވަނީ އިންޑިއާގެ އެގްޒިމް ބޭންކުން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގެ ފެނާއި ނަރުދަމާގެ މަސައްކަތް ނިންމައި، އިންޑިއާ ސަރުކާރުން ދިވެހި ސަރުކާރަށް ހަވާލު ކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ރައީސް މުޢިއްޒު ވިދާޅުވީ، އިންޑިއަން ގްރާންޓް އެސިސްޓެންސްގެ ދަށުން ހިންގާ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްތަކަކީ، އިޖްތިމާޢީ އިޤްތިޞާދީ ތަރައްޤީގައި ދެގައުމުގެ ދެމެދުގައި އޮތް ގުޅުން ހާމަކޮށްދޭ ކަމެއް ކަމަށެވެ. އަދި މި ސްކީމްގެ ދަށުން ގިނަ ޕްރޮޖެކްޓްތަކެއް މިހާރުވެސް ކުރިއަށްދާކަން ފާހަގަކުރެއްވިއެވެ.

"އިންޑިއާއަކީ އަޅުގަނޑުމެން އެހީ ބޭނުންވާ ކޮންމެ ވަގުތަކު ވެސް އެހީތެރިކަން ފޯރުކޮށްދޭ، އަޅުގަނޑުމެންގެ އެންމެ ގާތް އެކުވެރިޔާ އަދި އަގުނުކުރެވޭ އެއް ބައިވެރިޔާ،" ރައީސް މުޢިއްޒު ވިދާޅުވިއެވެ.

އެމަނިކުފާނުގެ ވާހަކަފުޅުގައި، އިންޑިއާއިން ރާއްޖެއަށް ފޯރުކޮށްދޭ އެހީތެރިކަމަށްޓަކައި އެގައުމުގެ ބޮޑުވަޒީރު ނަރެންދްރަ މޯދީ އަށް ސަރުކާރާއި ދިވެހި ރައްޔިތުންގެ ނަމުގައި ޝުކުރު އަދާކުރެއްވިއެވެ. އަދި ކުރިއަށް އޮތް އަހަރުތަކުގައި ރާއްޖެ އާއި އިންޑިއާގެ ގުޅުން އިތުރަށް ބަދަހިވެގެންދާނެ ކަމުގެ އުންމީދު ކުރައްވާކަމަށް ވެސް ވިދާޅުވިއެވެ.

މި ރަސްމިއްޔާތުގައި، އިންޑިއާގެ އެގްޒިމް ބޭންކުން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގައި ގާއިމްކޮށްފައިވާ ފެނާއި ނަރުދަމާ ނިޒާމްގެ މަސައްކަތްތައް ނިންމައި އިންޑިއާ ސަރުކާރުން ވަނީ ހަވާލުކޮށްފަ އެވެ.