ސިވިލް ކޯޓުގެ ފަނޑިޔާރު ފަރުހާދު ރަޝީދު ޖޭއެސްސީގެ މެންބަރަކަށް އިންތިޚާބުވެއްޖެ

ދަށު ކޯޓުތަކުގެ ފަނޑިޔާރުންގެ ތެރެއިން ޖުޑީޝަލް ސަރވިސް ކޮމިޝަނުގެ (ޖޭއެސްސީ) މެންބަރަކަށް ސިވިލް ކޯޓުގެ ފަނޑިޔާރު އަލްއުސްތާޛު ފަރުހާދު ރަޝީދު އިންތިޚާބުވެއްޖެއެވެ.

މި އިންތިޚާބުގައި ވާދަކުރި އެހެން ކެންޑިޑޭޓުންގެ ތެރޭގައި ކްރިމިނަލް ކޯޓުގެ ޤާޟީ އިބްރާހީމް އިޙްސާން، ސިވިލް ކޯޓުގެ ޤާޟީ ޢާއިޝަތު ޢަޒުފާ ޢަބްދުލްޣަފޫރު، ފެމިލީ ކޯޓުގެ ޤާޟީ ޢަބްދުهﷲ މުޙައްމަދު އަދި ސ. ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީޢުއްދީން އަޙްމަދު ހިމެނެއެވެ.

މި އިންތިޚާބަކީ ވަރޗުއަލްކޮށް ބޭއްވުނު ފުރަތަމަ އިންތިޚާބެވެ. އިންތިޚާބު ބާއްވާފައިވަނީ މޯލްޑިވްސް ސެކިއުރިޓީޒް ޑިޕޮސިޓަރީގެ އޮންލައިން ވެބް އެޕްލިކޭޝަން "ފަހިވޯޓް" މެދުވެރިކޮށް މިއަދު ހެނދުނު 10:00 އިން 12:00 އަށެވެ.

މި އިންތިޚާބަކީ ޖުޑީޝަލް ސަރވިސް ކޮމިޝަނުގެ ޤާނޫނުގެ 3 ވަނަ މާއްދާގެ 4 ވަނަ ނަންބަރުގައިވާ ގޮތުގެ މަތިން ދަށު ކޯޓުތަކުގެ ފަނޑިޔާރުންގެ ތެރެއިން އެ ކޯޓުތަކުން ޖޭއެސްސީއަށް އިންތިޚާބުކުރާ ފަނޑިޔާރު ހޮވުމަށް ބޭއްވުނު އިންތިޚާބެކެވެ.