ޝީލްޑް މެޗު ފަސޭހައިން ނުނަގާނެކަމަށް ގާޑިއޯލާ ބުނެފި

އިނގިރޭސި ފުޓްބޯޅަ ސީޒަން ފެށުމުގެ ގޮތުން ކުޅޭ ކޮމިއުނިޓީ ޝީލްޑް މެޗުގައި މެންޗެސްޓާ ޔުނައިޓެޑާ ދެކޮޅަށް ކުޅޭއިރު، މި މެޗު ފަސޭހަކޮށް ނުނަގާނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

އެންމެ ފަހުން ތިން ފަހަރު ވެސް ސިޓީ ވަނީ ޝީލްޑް މެޗުން ބަލިވެފައެވެ. މިއީ ޖެހިޖެހިގެން ހަތަރު ވަނަ ފަހަރަށް ސިޓީން ޝީލްޑް މެޗަށް ނުކުންނަ ފަހަރެވެ.

ގާޑިއޯލާ ބުނީ، މިއީ ފައިނަލެއް ކަމަށާއި މޮޅުވާން ބޭނުންވާ ކަމަށެވެ. "މި މެޗު މުހިންމު. މިއީ ފައިނަލެއް. އަހަރެމެން ފަސޭހަނުކުރާނަން،" ގާޑިއޯލާ ބުންޏެވެ.

ޔުނައިޓެޑްގެ ކޯޗު އެރިކް ޓެން ހާގް ބުނީ، ޝީލްޑް މެޗަކީ ވެސް ޓްރޮފީއަކަށް ކުޅޭ ފައިނަލަކަށްވާތީ، އޭނާ ޓީމު ތައްޔާރުކުރަނީ ވެސް އެ ވިސްނުމުގައި ކަމަށެވެ. "ވާދަވެރިކޮށް ކުޅެ، މި ތަށި ހޯދޭނެ ޓީމެއް އަހަރެން ސެޓުކުރާނީ. މި ކާމިޔާބުކުރަން ބޭނުން،" ޓެން ހާގް ބުންޏެވެ.

ޔުނައިޓެޑުން މި މެޗަށް ނުކުންނައިރު އަނިޔާގެ މައްސަލަތައް ބޮޑެވެ. އަލަށް ގެނައި ޑިފެންޑަރު ލެނީ ޔޯރޯ އާއި ފޯވާޑް ރަސްމުސް ހޮއިލުންޑް ކުޅުމާ ދުރުގައި ތިބޭނެއެވެ.

ޔުނައިޓެޑަކީ އެންމެ ގިނަ ފަހަރު ޝީލްޑް ކާމިޔާބުކުރި ޓީމެވެ. އެ ޓީމުން ވަނީ 21 ފަހަރު ޝީލްޑް އުފުލާލައިފައެވެ.

ޝީލްޑް މެޗުގައި ސިޓީ އާއި ޔުނައިޓެޑް ބައްދަލުކުރާ މެޗު ފަށާނީ މިރޭ ރާއްޖެ ގަޑިން 7 ޖަހާއިރުއެވެ.