ހުޅަނގު މޫސުމުގެ ވިއްސާރަ ގަދަވާނެތީ ސަމާލުވުމަށް އިލްތިމާސްކޮށްފި

މޫސުމާ ބެހޭ ގައުމީ އިދާރާ (މެޓް އޮފީސް) އިން މިއަދު އިލްތިމާސްކޮށްފިއެވެ. އަންނަ އާދީއްތަ ދުވަހުން ފެށިގެން މޫސުން ގޯސްވާނެތީ ސަމާލުވުމަށެވެ.

މެޓު އޮފީހުން މައުލޫމާތު ދިންގޮތުގައި، ރާއްޖެއަށް މިހާރު ކުރަމުން މިދަނީ ހުޅަނގު މޫސުމުގެ ވިއްސާރައެވެ. އަދި ރާއްޖެ ސަރަހައްދުގައި ހުޅަނގު މޫސުމުގެ ބާރު އާދިއްތަ ދުވަހުން ފެށިގެން ކުރިއަށް އޮތް ފަސް ދުވަހު ގަދަވާނެ ކަމަށް ބުނެފައިވެއެވެ.

މި މުއްދަތުގައި ރާއްޖޭގެ ބޮޑުބަޔަކަށް ގުގުރުމާ އެކު ވިއްސާރަކުރާނެ ކަމަށް މެޓު އޮފީހުން ބުނެފައިވެއެވެ. އަދި ވިލާގަނޑުގައި ގަޑިއަކު 40-45 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށާއި، ކަނޑުތައް ގަދަވާނެ ކަމަށްވެސް ބުނެފައިވެއެވެ.

"ބޯކޮށް ވާރޭވެހި ވިލާގަނޑުގައި ކަނޑުތައް ގަދަވާނެ ކަމަށް ލަފާކުރެވޭތީ އެންމެހައި ފަރާތްތަކުން މޫސުމަށް ސަމާލުވުމަށް އިލްތިމާސްކުރަމެވެ." މެޓު އޮފީހުން މިއަދު ނެރުނު އެންގުމެއްގައި ބުނެފައިވެއެވެ.

މީގެ އިތުރުން، މެޓު އޮފީހުން ވަނީ ކަނޑުދަތުރުކުރުމުގައި ވެސް މޫސުމަށް ބަލައިގެން ދަތުރުކުރުމަށް އެދިފައެވެ. މޫސުން ގޯސްވުމުގެ ސަބަބުން އުޅަނދުފަހަރަށް ގެއްލުން ލިބުމާއި، ކަނޑުމަތީގައި ހާދިސާތައް ހިނގުމުގެ ފުރުސަތު އޮތްކަމަށް މެޓު އޮފީހުން ފާހަގަކޮށްފައިވެއެވެ.

ރައްޔިތުންނަށް މެޓު އޮފީހުން އިލްތިމާސްކޮށްފައިވަނީ، މޫސުމާ ބެހޭ އެންމެ ފަހުގެ މައުލޫމާތުތައް ބަލަމުން ގެންދިއުމަށާއި، ރައްކާތެރިކަމުގެ ފިޔަވަޅުތައް އަޅަމުން ގެންދިއުމަށެވެ. އަދި ކުއްލި ހާލަތެއްގައި ގުޅަންޖެހޭ ނަންބަރުތައް އަބަދުވެސް ފަސޭހައިން ލިބޭނެހެން ބެހެއްޓުމަށްވެސް އިރުޝާދު ދީފައިވެއެވެ.