މޮރޮކޯއިން އޮލިމްޕިކްސްގެ ފުޓްބޯޅައިން ފުރަތަމަ މެޑަލް ހޯދައިފި

މޮރޮކޯގެ ފޯވާޑް ސުފިއާން ރަހީމީ

މޮރޮކޯއިން އެ ޤައުމުގެ އޮލިމްޕިކްސްގެތާރީޙްގައި ފުޓްބޯޅައިން ފުރަތަމަ ފަހަރަށް މެޑަލް ހޯދައިފި އެވެ.

ފުޓްބޯޅަ އިވެންޓުން ތިންވަނަ ހޯދުމަށް ކުޅުނު މެޗުގައި މިސްރާއި ބައްދަލުކޮށް މޮރޮކޯއިން ލޯމެޑެލް ހޯދީ 6-0 ގެ ނަތީޖާއަކުން މިސްރު ބަލިކޮށްގެންނެވެ.

ރޭ ކުޅުވުނު މެޗުގެ ފުރަތަމަ ހާފު ނިމުނުއިރު މޮރޮކޯ އިން ދެ ގޯލުގެ ލީޑެއް ނަގާފައިވެ އެވެ. މި ދެ ގޯލު ޖެހީ އަބްދޭ އެޒަލްޒޫލީ އާއި ސުފިއާން ރަހީމީ އެވެ. ދެވަނަ ހާފުގައި ރަހީމީ އިތުރު ގޯލެއް ޖެހި އެވެ. އަދި ބިލާލް އަލް ޚަނޫސް އާއި އަކްރަމް ނަޤާޝް ވެސް ގޯލު ޖަހައިފައިވެ އެވެ. މެޗުގެ އެންމެ ފަހު ގޯލު ޖެހީ ކެޕްޓަން އަޝްރަފް ހަކީމީ އެވެ. އެއީ މެޗު ނިމެނިކޮށް ލިބުނު ހިލޭ ޖެހުމަކުންނެވެ.

މި މެޗުގައި މޮރޮކޯގެ ފޯވާޑް ސުފިއާން ރަހީމީ ކާމިޔާބުކުރި ދެ ގޯލާއިއެކު މުބާރާތުގައި ކުޅުނު ހުރިހާ މެޗެއްގައި ވެސް ގޯލު ޖެހުމުގެ ޝަރަފް ރަހީމީ ވަނީ ހޯދައިފައެވެ. އަދި އޭނާ ވަނީ މުޅި މުބާރާތުގައި ޖުމްލަ އަށް ގޯލު ޖަހައި، މުބާރާތުގެ ލަނޑު ލިސްޓުގެ އެއްވަނަ ހޯދައިފަ އެވެ.

އުމުރުން 28 އަހަރުގެ ރަހީމީ އަކީ މޮރޮކޯގެ 23 އަހަރުން ދަށުގެ ޓީމުގައި ހިމެނޭ އުމުރުން ދޮށީ ތިން ކުޅުންތެރިންގެ ތެރެއިން އެކެކެވެ. އޭނާ މިހާރު ކުޅެމުންދަނީ ޔޫއޭއީގެ އަލް އައިން ކްލަބަށެވެ.

މި ކާމިޔާބީއާ އެކު މޮރޮކޯއިން ވަނީ އޮލިމްޕިކްސްގެ ފުޓްބޯޅައިން ފުރަތަމަ ފަހަރަށް މެޑަލް ހޯދުމުގެ ޝަރަފު ހޯދައިފަ އެވެ.

އޮލިންޕިކްސް ޕެރިސް 2024 އޮލިންޕިކްސް