ބަންގްލަދޭޝްގެ ވަގުތީ ބޮޑުވަޒީރަށް ރައީސުލްޖުމުހޫރިއްޔާ މަރުހަބާ ވިދާޅުވެއްޖެ

ބަންގްލަދޭޝްގެ ވަގުތީ ވެރިއަކަށް ހަމަޖެހުނު މުހައްމަދު ޔޫނުސް އަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެއެވެ.

ރައީސް ޑރ. މުއިއްޒު ވަނީ އެކްސްގައި ޕޯސްޓެއް ކުރައްވައި ޔޫނުސް އަށް މަރުހަބާ ވިދާޅުވެ، އޭނާގެ ވެރިކަމުގައި ބަންގްލަދޭޝަށް ކުރިއެރުން އެދިވަޑައިގެންފައިވެއެވެ.

ސިވިލް ސާވިސްގެ ވަޒީފާތަކާ ގުޅޭ ސިޔާސަތުތަކާ ދެކޮޅަށް ފެށުނު މުޒާހަރާތައް ބޮޑު ހަމަނުޖެހުމަކަށް ބަދަލުވުމާ ގުޅިގެން، ބޮޑުވަޒީރު ޝައިހް ހަސީނާ ވަނީ އިސްތިއުފާ ދެއްވައި ޤައުމު ދޫކުރައްވާ ވަޑައިގެންފައެވެ. އެ ޤައުމުގެ އަސްކަރިއްޔާގެ އެހީގައި ސިޔާސީ ޕާޓީތަކުން މަޝްވަރާކޮށް ވަގުތީ ސަރުކާރެއް އުފައްދައި، ނޯބެލް އިނާމު ލިބިފައިވާ މުހައްމަދު ޔޫނުސް ވަނީ އެ ޤައުމުގެ ވަގުތީ ވެރިއަކަށް ހަމަޖައްސާފައިވެއެވެ.

އުމުރުފުޅުން 84 އަހަރުގެ ޔޫނުސް މިއަދު ބަންގްލަދޭޝަށް ވަޑައިގެން މަޤާމާ ހަވާލުވެވަޑައިގެންނެވިއިރު، ޤައުމު އަލުން ހަމައަކަށް އެޅުވުމަކީ އޭނާގެ ކުރިމަތީގައިވާ ބޮޑު ގޮންޖެހުމެކެވެ. އެހެނީ ބަންގްލަދޭޝްގައި މިހާރުވެސް ޝައިހް ހަސީނާއަށް ތާއީދު ކުރާ މިލިއަނެއްހާ މީހުން އެބަތިއްބެވެ.