ޖަޕާނުގައި ފުރަތަމަ ފަހަރަށް "މެގާކުއޭކް" އެއްގެ އިންޒާރު ދީފި

ޖަޕާނުގެ ދެކުނު ސަރަހައްދުގައި ރިކްޓަރ ސްކޭލްގެ 7.1 ގެ ބާރުގަދަ ބިންހެލުމެއް އައުމާ ގުޅިގެން، ޖަޕާނުން ވަނީ ފުރަތަމަ ފަހަރަށް "މެގާކުއޭކް" އަކަށް އިންޒާރު ދީފައެވެ. މި ބިންހެލުން އައީ ބުރާސްފަތި ދުވަހުގެ ހަވީރު 4:42 ގައި ކިއުޝޫ ޖަޒީރާގެ މިޔަޒަކީ ޕްރިފެކްޗަރގެ އައްސޭރިފަށުންނެވެ.

ޖަޕާނުގެ މޫސުމާބެހޭ އިދާރާއިން މަޢުލޫމާތު ދެއްވާފައިވާ ގޮތުގައި މި ބިންހެލުން އައީ ފަނަރަ މޭލު ފުންމިނުގައެވެ. މި ބިންހެލުމާ ގުޅިގެން ސުނާމީ އިންޒާރެއް ނެރުނު ނަމަވެސް، ފާހަގަކުރެވޭފަދަ ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ. އަދި އެއްވެސް މީހަކަށް ބޮޑު އަނިޔާއެއްވެސް ވެފައެއް ނުވެއެވެ.

ޖަޕާނުގެ ޗީފް ކެބިނެޓް ސެކްރެޓަރީ ޔޮޝިމަސާ ހަޔަޝީ ވިދާޅުވި ގޮތުގައި ތިން މީހަކަށް ކުދިކުދި އަނިޔާތަކެއް ވެފައިވާ ކަމަށް ރިޕޯޓު ކުރެވިފައިވެއެވެ. އަދި މިޔަޒަކީ ޕްރިފެކްޗަރގެ ފުލުހުން މަޢުލޫމާތު ދެއްވާފައިވާ ގޮތުގައި ގެއްލުން ލިބުނު ކަމުގެ 10 ރިޕޯޓު ލިބިފައިވެއެވެ. ހަޔަޝީ ވަނީ އެ ސަރަހައްދުގެ ރައްޔިތުންނަށް އައްސޭރިފަށުން ދުރުގައި ތިބުމަށް އިލްތިމާސް ކުރައްވާފައެވެ.

ބިންހެލުމާ ގުޅިގެން ބޭއްވުނު ކުއްލި ބައްދަލުވުމެއްގައި، ބިންހެލުމުގެ ސަބަބުން ކައިރީގައިވާ ނަންކައި ޓްރަފްގެ ސަރަހައްދަށް އަސަރު ކޮށްފައިވޭތޯ ދިރާސާކޮށްފައިވެއެވެ. މޫސުމާބެހޭ އިދާރާއިން ވަނީ "މެގާ އަރތްކުއޭކް ކޯޝަން" އެއް ނެރެ، ކުރިއަށް އޮތް ތަނުގައި ބޮޑު ބިންހެލުމެއް އައުމުގެ ފުރުސަތު އާދަޔާ ޚިލާފަށް ބޮޑުކަމަށް އަންގާފައެވެ. ނަމަވެސް ކައިރި މުސްތަޤުބަލެއްގައި ބޮޑު ބިންހެލުމެއް ކަށަވަރުކަމާއެކު އަންނާނެ ކަމަކަށް  ބުނެފައެއްނުވެއެވެ.