އާސަންދައިގެ ޚަރަދާއި ޚިދުމަތްތައް އިތުރުވެއްޖެ

އާސަންދައިގެ ޚިދުމަތް ހަރުދަނާ ކުރުމަށް މި ސަރުކާރުން އަންނަނީ ގިނަގުނަ މަސައްކަތްތަކެއް ކުރަމުން

އާސަންދަ ކުންފުނިން އާންމުކުރި އެންމެ ފަހުގެ ތަފާސްހިސާބުތަކުން ދައްކާގޮތުގައި، މިއަހަރުގެ ދެވަނަ ކުއާޓަރގައި އާސަންދަ ސްކީމުގެ ދަށުން ކުރެވުނު ޚަރަދާއި ފޯރުކޮށްދެވުނު ޚިދުމަތްތައް ވަނީ ފާހަގަކޮށްލެވޭ މިންވަރަކަށް އިތުރުވެފައެވެ.

މިއަހަރުގެ އޭޕްރީލް މަހުން ޖޫން މަހުގެ ނިޔަލަށް، އާސަންދަ ސްކީމުގެ ދަށުން 823 މިލިޔަން ރުފިޔާ ޚަރަދުކޮށްފައިވާއިރު، މިއީ ފާއިތުވި އަހަރުގެ މިމުއްދަތާ އަޅާބަލާއިރު 11.5 އިންސައްތައިގެ އިތުރުވުމެކެވެ. އަދި ޚިދުމަތް ލިބިގަތް ފަރާތްތަކުގެ އަދަދުވެސް ވަނީ 265،059 އަށް އަރާފައެވެ.

އިމަޖެންސީ ހާލަތްތަކުގައި ބަލިމީހުން އެއްރަށުން އަނެއްރަށަށް ގެންދިއުމުގެ ޚިދުމަތްވެސް ވަނީ 1،232 ފަހަރު ފޯރުކޮށްދީފައެވެ. މީގެއިތުރުން، 2،807 ބަލިމީހުންނަށް ރާއްޖެއިން ބޭރުން ފަރުވާ ހޯދުމަށް އެހީތެރިވެދީފައިވެއެވެ.

އާސަންދަ ސްކީމުގެ ޚިދުމަތްތައް އިތުރަށް ފުޅާކުރުމުގެ ގޮތުން، ހިލޭ މެޑިކަލް ޗެކަޕްގެ ޚިދުމަތް ފޯރުކޮށްދިނުމަށް ވަނީ ފަށާފައެވެ. މިކަމުގެ ސަބަބުން ރައްޔިތުންނަށް ލިބޭ ޞިއްޙީ ރައްކާތެރިކަން އިތުރަށް ހަރުދަނާވެގެންދާނެ ކަމަށް ބެލެވެއެވެ.

އާސަންދަ