ޣައްޒާގައި ހިނގަމުންދާ ހަނގުރާމަ ވަގުތުން ހުއްޓާލުމަށް މިނިސްޓަރު ޒަމީރު ގޮވާލައްވައިފި

ފަލަސްތީނުގައި އިޒްރޭލުން ހިންގަމުންދާ އިންސާނިއްޔަތާ ޚިލާފު އަމަލުތައް ހުއްޓުވުމަށާއި ޣައްޒާގައި ހިނގަމުންދާ ހަނގުރާމަ ވަގުތުން ނިމުމަކަށް ގެނައުމަށް ރާއްޖޭގެ ފޮރިން މިނިސްޓަރު މޫސާ ޒަމީރު ގޮވާލައްވައިފިއެވެ.

އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ހާރިޖީ ވަޒީރުންގެ ކުއްލި ބައްދަލުވުމެއްގައި ވާހަކަފުޅު ދައްކަވަމުން މިނިސްޓަރު ޒަމީރު ވިދާޅުވީ، ބައިނަލްއަޤްވާމީ ޤާނޫނުތަކާއި އިންސާނީ ޙައްޤުތަކާ ބެހޭ ޤާނޫނުތައް ހުރިހާ ޤައުމުތަކަކަށް ހަމަހަމަކަމާއެކު ތަންފީޒުކުރުމަކީ ދުނިޔޭގެ މުޖުތަމަޢުގެ ޒިންމާއެއް ކަމަށެވެ.

މިނިސްޓަރު އިތުރަށް ވިދާޅުވީ، މިވަގުތު އެންމެ އިސްކަންދޭންވީ ކަމަކީ ޣައްޒާގެ ހަނގުރާމަ ވަގުތުން ހުއްޓުވައި، ފަލަސްތީނު ރައްޔިތުންނަށް އަސާސީ ޚިދުމަތްތައް ފޯރުކޮށްދިނުން ކަށަވަރުކުރުން ކަމަށެވެ. އަދި ރާއްޖެއިން އަބަދުވެސް ފަލަސްތީނުގެ ޙައްޤުގައި ވަކާލާތުކޮށް، އެ މައްސަލައަށް ދާއިމީ ޙައްލެއް ހޯދުމަށް މަސައްކަތްކުރާނެ ކަމުގެ ޔަޤީންކަން އެރުވިއެވެ.

މިނިސްޓަރު ޒަމީރު ފާހަގަކުރެއްވި ގޮތުގައި، މި ހަމަނުޖެހުމަށް އޮތް ދެމެހެއްޓެނިވި ހައްލަކީ 1967 ގެ ކުރީގެ ފަލަސްތީނުގެ ސަރަޙައްދުތަކުގެ މައްޗަށް ބިނާކޮށް، އިރުމަތީ ޤުދުސް އަކީ އޭގެ ވެރިރަށް ކަމުގައި ބަލައިގަނެ، މިނިވަން އަދި ސިޔާދަތީ ބާރު ލިބިގެންވާ ފަލަސްތީނު ދައުލަތެއް ޤާއިމުކުރުމެވެ.

އީރާނުގައި ހުންނެވި ހަމާސްގެ އިސްވެރިޔާ އިސްމާޢީލް ހަނިއްޔާ އިޒްރޭލުގެ ހަމަލާއަކުން ޝަހީދުކޮށްލައިފަިވާ ކަން ކުށްވެރިކުރައްވައި، މިފަދަ ޢަމަލުތަކަކީ ސަރަޙައްދުގެ ސުލްޙައަށް ނޭދެވޭ އަސަރުކުރާނެ ކަންކަން ކަމަށް މިނިސްޓަރު ޒަމީރު ވިދާޅުވިއެވެ. އަދި ހުރިހާ ފަރާތްތަކުން ވެސް އަވަސް ޙައްލަކަށް މަސައްކަތްކުރުމުގެ މުހިންމުކަން އޭނާ ފާހަގަކުރެއްވިއެވެ. މިނިސްޓަރުގެ މި ބަސްތަކުން، ރާއްޖެއިން ސަރަޙައްދުގެ ހަމަޖެހުމަށް ދޭ އަހައްމިއްޔަތުކަން ހާމަވެގެންދެއެވެ.