ވަޒީފާއާބެހޭ ކަންކަން ބަލަހައްޓާ އިދާރާ ހޯމް މިނިސްޓްރީގެ ދަށަށް ބަދަލުކޮށްފި

ވަޒީފާ އަދާކުރާ ފަރާތްތަކުގެ ޙައްޤުތައް ރައްކާތެރިކުރުމަށް އުފައްދާފައިވާ ލޭބަރ ރިލޭޝަންސް އޮތޯރިޓީގެ ހިންގުން އިއްޔެއިން ފެށިގެން ހޯމް މިނިސްޓްރީގެ ދަށަށް ބަދަލުކޮށްފިއެވެ.

ރައީސް އޮފީހުން މިއަދު ހާމަކުރި ގޮތުގައި، މި ބަދަލު ގެނެވުނީ ބިދޭސީންނާ ގުޅޭ މައްސަލަތައް ހައްލުކުރުމާ ގުޅޭގޮތުން ކެބިނެޓުގައި މަޝްވަރާކުރުމަށްފަހުގައެވެ.

މިހާތަނަށް އެ އޮތޯރިޓީ ހިނގަމުން އައީ ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް މިނިސްޓްރީގެ ދަށުންނެވެ. އޭގެ ކުރިން އެ އޮތޯރިޓީ ހިނގަމުން އައީ އިކޮނޮމިކް މިނިސްޓްރީގެ ބެލުމުގެ ދަށުންނެވެ.

ވަޒީފާއާބެހޭ ޤާނޫނުގެ ދަށުން އުފައްދާފައިވާ މި އިދާރާ މިހާރު ހިނގަމުންދާނީ ހޯމް މިނިސްޓްރީގެ ދަށުންނެވެ. އެ މިނިސްޓްރީގެ ދަށުން ހިނގާ އެހެން އިދާރާތަކުގެ ތެރޭގައި އިމިގްރޭޝަން، ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން، އެންސީއައިޓީ، އެންޑީއޭ، ޑިޕާޓްމަންޓް އޮފް ޖުވެނައިލް ޖަސްޓިސް އަދި ނޭޝަނަލް ސައިބަރ ސެކިއުރިޓީ ހިމެނެއެވެ.

ލޭބަރ ރިލޭޝަންސް އޮތޯރިޓީގެ ހިންގުން ހޯމް މިނިސްޓްރީގެ ދަށަށް ބަދަލުކޮށްފައިވާ އިރު މި ސަރުކާރުން ވަނީ ރާއްޖޭގައި ޤަވާޢިދާ ޚިލާފަށް މަސައްކަތް ކުރަމުންގެންދާ ބިދޭސީންގެ މައްސަލަ ހައްލުކުރުމަށް މަސައްކަތްތަކެއް ފަށާފައެވެ. އެގޮތުން މިނިސްޓްރީގެ ކަމާބެހޭ ފަރާތްތަކުގެ މަސައްކަތުން މިހާތަނަށް ވަނީ ޤަވާއިދާއި ޚިލާފަށް މަސައްކަތް ކުރަމުން ގެންދިޔަ ގިނަ އަދަދެއްގެ ބިދޭސީން ހައްޔަރުކޮށް ޑީޕޯޓްވެސް ކޮށްލައިފައެވެ.