ހަސީނާ އިސްތިއުފާ ދެއްވުމުން ބަންގްލަދޭޝްގެ ޤާނޫނު ހަދާ މަޖިލިސް އުވައިލައިފި
ބަންގްލަދޭޝްގެ ވެރިރަށް ޑާކާގައި ސަރުކާރާ ދެކޮޅު މުޒާހަރާގެ ބައިވެރިން އަވާމީ ލީގުގެ ޕާޓީގެ އޮފީސް އަންދާލާފައި ފޮޓޯ: އޭއެފްޕީ
ބަންގްލަދޭޝް ޤާނޫނު ހަދާ މަޖިލިސް އުވައިލާފައިވާ ކަން އެ ޤައުމުގެ ރިޔާސީ ގަނޑުވަރުން އިޢުލާންކޮށްފިއެވެ.
ބަންގްލަދޭޝްގެ ޤާނޫނު ހަދާ މަޖިލިސް އުވާލާފައިވަނީ، ގިނަ ދުވަސްތަކެއް ވަންދެން ބޮޑުވަޒީރުކަން ކުރެއްވި ޝައިޚް ހަސީނާ އިސްތިއުފާ ދެއްވައި އެގައުމުން ފިލައިގެން ދިޔަތާ އެއް ދުވަސް ފަހުންނެވެ.
ދާދި ފަހުން އައު ދައުރަކަށް އިންތިޚާބުވެވަޑައިގެންނެވި ޢުމުރުން 76 އަހަރުގެ ޙަސީނާ އިސްތިޢުފާ ދެއްވާފައި ވަނީ ސަރުކާރު ވަޒީފާތަކަށް މީހުން ޢައްޔަން ކުރުމުގައި އަމަލު ކުރަމުން ދިޔަ ކޯޓާ ނިޒާމާ ދެކޮޅަށް ފެށި މުޒާހަރާތައް ހޫނުވުމާ ގުޅިގެންނެވެ. އެ މުޒާހަރާތައް ރޫޅައިލަން ފުލުހުން ބާރުގެ ބޭނުން ކުރުމުން ހިނގި ކުރިމަތިލުންތަކުގައި މަރުވި މީހުންގެ ޢަދަދު ވަނީ 300އަށްވުރެ މައްޗަށް އުފުލިފައެވެ. އޭގެ ތެރޭގައި ގިނައީ، މުޒާހަރާތަކުގައި ބައިވެރިވި ކޮލެޖުތަކާއި ޔުނިވަރސިޓީތަކުގެ ދަރިވަރުންނެވެ.
ދަރިވަރުން އިސްނަގައިގެން ކުރިއަށް ގެންދާ މުޒާހަރާތައް އިންތިޒާމުކުރާ ފަރާތްތަކުން އަސްކަރިއްޔާގެ އޮފިޝަލުންނާ ބައްދަލުކޮށް، އަސްކަރިއްޔާގެ ސަރުކާރެއް ބަލައިނުގަންނާނެ ކަމަށް ވަނީ ބުނެފައެވެ.
މުޒާހަރާ ކުރާ މީހުން ބުނެފައިވަނީ، ވަގުތީ ސަރުކާރުގެ އިސްވެރިއަކަށް ވާން ޖެހޭނީ ސުލްހައިގެ ނޮބެލް އިނާމު ލިބިވަޑައިގެންފައިވާ މުހައްމަދު ޔޫނުސް ކަމަށެވެ.
ކުރީގެ ބޮޑުވަޒީރު ޚާލިދާ ޒިޔާގެ ޕާޓީގެ ތަރުޖަމާނަކު، އޭއެފްޕީއަށް ވިދާޅުވީ އިދިކޮޅު ލީޑަރު ދޫކޮށްލީ އެތައް އަހަރެއް ވަންދެން ގޭބަންދުގައި ބެހެއްޓުމަށްފަހު ހަސީނާ އިސްތިއުފާ ދެއްވުމާ ގުޅިގެންނެވެ.
ކޮމެންޓް