ނައިބު ރައީސްގެ އިލްތިމާޞްއެއް: "ވާހަކައެއް ދެއްކެވުމުގެ ކުރިން ވިސްނުން އެއްކުރައްވާ!"

ވާހަކަދެއްކުމުގެ ޤާބިލްކަން ލިބިފައި ހުރި ކޮންމެ މީހަކަށްވެސް އެމީހަކު ބޭނުންފުޅު ވާހަކައެއް ދެއްކޭނެ ކަމަށާއި، ނަމަވެސް ވާހަކައެއް ދެއްކުމުގެ ކުރިން ވިސްނުން އިސްކުރުމަށް ރައީސުލްޖުމްހޫރިއްޔާގެ ނައިބު، ޙުސައިން މުޙައްމަދު ލަތީފް އިލްތިމާޞް ކުރައްވައިފިއެވެ.

ނައިބު ރައީސް މިހެން ވިދާޅުވީ، ޕީއެންސީ ހަރުގޭގައި މިހާރު ކުރިއަށްދާ ޖަލްސާގައި ވާހަކަފުޅު ދައްކަވަމުންނެވެ.

“މިއަދު އަޅުގަނޑަށްވެސް ބޭނުން ވާހަކައެއް ދެއްކިދާނެ. އެ އިޚްތިޔާރު އަޅުގަނޑަށް އެބަ އޮތް. އެކަމަކު ވާހަކައެއް ދެއްކުމުގެ ކުރިން ވިސްނުން އިސްކުރަން ވާނެ. އެހެން ނޫންނަމަ އެކަމުގެ ސަބަބުން މުޖުތަމަޢުން އޭގެ ނޭދެވޭ އަސަރު ފެންނާނެ - ނައިބު ރައީސް ވިދާޅުވިއެވެ.

ނައިބު ރައީސް މިފަދައިން ވިދާޅުވީ ސަރުކާރާ ގުޅޭގޮތުން އިދިކޮޅު ފަރާތްތައް މިހާރު ދައްކަވަމުން ގެންދަވާ ވާހަކަފުޅުތަކާ ގުޅޭގޮތުން އެކަމަށް ރައްދެއް ދެއްވުމުގެ ގޮތުން ކަމަށް ބެލެވެއެވެ.

މިރޭގެ ޖަލްސާގައި ވާހަކަފުޅު ދެއްކެވި އިނގުރައިދޫ ދާއިރާގެ ފަލާޙު ވަނީ ރައީސް ޔާމީނަށް ވަރަށް ވަރުގަދަ ބަހުގެ ޙަމަލާތައް ރައްދު ކޮށްފައެވެ.

“ރައީސް ޔާމީނަށް މިއަދު އަޅުގަނޑު ވެއްޖެ ނުކިޔަވާ މީހަކަށް. އޭރު އަޅުގަނޑު ހަމަ ރަނގަޅު. ރައީސް ޔާމީންގެ ނަޒަރުގައި އަޅުގަނޑު އޭރު ހުރީ ކިޔަވައިގެން. މިއަދު ނުކިޔަވާ. މީގެ ކުރިން ޢަބްދުއްރަޙީމަކީވެސް ކިޔަވައިގެން ހުރި ބޭފުޅެއް. ނަމަވެސް މިއަދު ޢަބްދުއްރަޙީމްވެސް ވެއްޖެ ނުކިޔަވާ ހުރި މީހަކަށް. މި ވާގޮތެއް އެބަ ޖެހޭ ބަލަން - ފަލާޙު ވިދާޅުވިއެވެ.

އިތުރަށް ވާހަކަފުޅު ދައްކަވަމުން ފަލާޙު ވިދާޅުވީ، ރައީސް ޑރ މުޢިއްޒަކީ މި ޤައުމުގައި ދެ ދަޢުރު ވެރިކަން ކުރައްވާނެ ވެރިއެއް ކަމަށާއި، ﷲގެ ރަޙްމަތްފުޅުން އެކަން ފުރިހަމަވާނެ ކަމަށެވެ.