ރަސްމާލޭގައި އަބޫދާބީގެ މަޝްހޫރު ޑިވެލޮޕާ "އީގަލް ހިލްސް" އިން ހިންގުމަށް ހަމަޖެހިފައިވާ 20 ބިލިއަން ޑޮލަރުގެ މަޝްރޫއަކީ މުޅި ރާއްޖޭގެ އިގުތިސާދަށް ބޮޑު އިންގިލާބީ ބަދަލެއް ގެނެސްދޭނެ ތާރީހީ އިންވެސްޓްމަންޓެއް ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.
ޕީއެސްއެމް ޕްރޮގްރާމެއްގައި ރޭ ވާހަކަދައްކަވަމުން މިނިސްޓަރު ފާހަގަކުރެއްވީ، ރާއްޖޭގެ މިހާރުގެ ޖީޑީޕީއަކީ 7.7 ބިލިއަން ޑޮލަރު ކަމަށްވާއިރު، ރަސްމާލޭގެ މި އެކަނި މަޝްރޫއަކީވެސް ރާއްޖޭގެ ޖީޑީޕީގެ ގާތްގަނޑަކަށް 3 ގުނަ އާއި އެއްވަރުގެ ބޮޑު އިންވެސްޓްމަންޓެއް ކަމަށެވެ. މިއީ ރާއްޖެއާމެދު ބޭރުގެ ދުނިޔެއިން ދެކޭގޮތް މުޅިން ބަދަލުކޮށްލާނެ ކަމެއްގެ ގޮތުގައި މިނިސްޓަރު ސިފަކުރެއްވި އެވެ.
މިނިސްޓަރ ވިދާޅުވީ މިއީ އާދައިގެ ބަޔަކާއެކު ކުރިއަށްގެންދާ މަޝްރޫއެއް ނޫންކަމަށާއި އީގަލް ހިލްސްއަކީ ދުނިޔޭގެ އެންމެ އުސް އިމާރާތް ކަމަށްވާ ދުބާއީގެ "ބުރުޖް ހަލީފާ" އާއި "ޑުބާއީ މޯލް" ތަރައްގީ ކުރި މަޝްހޫރު އިމާރް ކުންފުނީގެ ފައުންޑާގެ ކުންފުންޏެއް ކަމަށެވެ.
މިގޮތުން އީގަލް ހިލްސްއިން މިހާރުވެސް ދުނިޔޭގެ 18 އަށްވުރެ ގިނަ ގައުމުގައި 45 މަޝްރޫޢު ހިންގަމުންދާއިރު، މިއީ ދުނިޔޭގެ އެންމެ ކުރިއަރާފައިވާ އިންފްރާސްޓްރަކްޗާ ބިނާކުރުމުގެ ގާބިލުކަން ހުރި ފަރާތެއްކަން ސާބިތުވެފައިވާ ކަމަށް މިނިސްޓަރު ފާހަގަކުރެއްވި އެވެ.
މި މަޝްރޫއުގެ ފީސިބިލިޓީ ދިރާސާކުރުމުގެ ތެރެއިން ސަރުކާރުގެ ޓީމަކުން ވަނީ އީގަލް ހިލްސްއިން މިސްރުގެ އެލެކްޒެންޑްރިއާގައި ތަރައްގީކޮށްފައިވާ "މަރާސީ" އިންޓަގްރޭޓެޑް ސިޓީއަށް ޒިޔާރަތްކޮށްފައި ކަމަށް ވެސް މިނިސްޓަރު ވިދާޅުވިއެވެ.
އެތަނުގައި ޔޮޓް މެރީނާއަކާއި، 3 ހޮޓަލާއި، ސްމާޓް ސިޓީއެއްގެ ގޮތުގައި 3 ރޭންޖެއްގެ ޕްރޮޕަޓީސް ހިމެނޭ 3 ޓައުން ހަދާފައިވާކަން ފާހަގަކުރައްވައި، މިނިސްޓަރު ވިދާޅުވީ އެ ތަޖުރިބާއާއެކު ރަސްމާލެއިން ލިބިގެންދާނެ އިގުތިސާދީ ފައިދާ ވަރަށް ސާފުކޮށް ތަސައްވުރު ކުރެވިގެންދިޔަ ކަމަށެވެ.
އަދި އެލެކްޒެންޑްރިއާގެ ގިނަ ޕްރޮޕަޓީތައް ހިންގަން ދިވެހިން ތިބިކަމީ ދިވެހިންގެ މަސައްކަތަށް އެ ކުންފުނިން ކުރާ އިތުބާރު ދައްކުވައިދޭ ކަމެއް ކަމަށްވެސް މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ، މިއީ ހަމައެކަނި ވަކި މަޝްރޫއެއްގެ ގޮތުގައި ހިންގާ ކަމެއް ނޫން ކަމަށާއި، މީގެ ސަބަބުން ރާއްޖެއަށް އަންނާނެ އިންވެސްޓަރުންގެ އިތުބާރު ބޮޑުވެ، އެހެން އިންވެސްޓަރުން ހޯދުމަށް ފުރުސަތު ފަހިވެގެންދާނެ ކަމަށެވެ.
މި މަޝްރޫއުގެ ތެރެއިން ދިވެހި ކުންފުނިތަކަށާއި އެކިއެކި ވިޔަފާރިތަކަށް ބޮޑެތި ފުރުސަތުތަކެއް ހުޅުވިގެންދާނެކަމުގެ ޔަގީންކަން ވެސް މިނިސްޓަރު ދެއްވި އެވެ.
ކޮމެންޓް