މަތިވެރި ވޮލީ ލީގު‏‎:‎‏ ގަދަ ހިތްވަރާއެކު ‏އާރުބީޖީ އަދި ތޮއްޑޫ،‏ އަންހެން ޑިވިޝަންގެ ފައިނަލަށް

މަތިވެރި ވޮލީ ލީގުގެ އަންހެން ޑިވިޝަންގެ ފައިނަލަށް އއ. ބޮޑު ފޮޅުދޫ ގެ އާރުބީޖީ ސްޕޯޓްސް ކުލަބާއި، އއ. ތޮއްޑޫއިން ބައިވެރިވި ތޮއްޑޫ ސްޕޯޓްސް ކުލަބު ދަތުރުކޮށްފި އެވެ.

އަންހެން ފައިނަލް މެޗް އޮންނާނީ މާދަމާ ރޭ 8:30 ގައި މަތިވެރި ވޮލީ ކޯޓުގަ އެވެ. އަދި ފިރިހެން ފައިނަލް މެޗް އޮންނާނީ ހޮނިހިރު ދުވަހުގެ ރޭގަ އެވެ.

އެ ދެ ޓީމު ފައިނަލަށް ދިޔައީ ސެމީ ފައިނަލުގެ މެޗުތައް ކާމިޔާބު ކޮށްގެންނެވެ.

އެގޮތުން ފުރަތަމަ ސެމީގެ މެޗުގައި މަތިވެރީގެ މަތިވެރި ވޮލީ ޓީމާ ދެކޮޅަށް ކުޅެ، އާރުބީޖީ ސްޕޯޓްސް ކުލަބު ވަނީ ކާމިޔާބު ހޯދައި ފައިނަލަށް ގޮސްފަ އެވެ.

އެ މެޗު އާރުބީޖީން ކާމިޔާބުކުރީ 3 ސެޓު 2 ސެޓުންނެވެ.

ދެވަނަ ސެމީގެ މެޗު ތޮއްޑޫއިން ކާމިޔާބުކުރީ ބޮޑުފުޅަދޫ އަށް ނިސްބަތްވާ ޔަންގް ޕްލެޔާސް ސްޕޯޓްސް ކުލަބު ބަލިކޮށެވެ. އެ މެޗު އެ ޓީމު ކާމިޔާބުކުރީ 3 ސެޓު 1 ސެޓުންނެވެ.

ތޮއްޑޫއާއި އާރުބީޖީ ބައްދަލުކުރާ ފައިނަލް މެޗު ކުޅެން ހަމަޖެހިފައިވަނީ މާދަމާގެ ވަގުތެއްގަ އެވެ.

މަތިވެރި ވޮލީ ލީގަކީ 2024 ވަނަ އަހަރުން ފެށިގެން ބާއްވަމުން އަންނަ މުބާރާތެވެ. މި މުބާރާތް ބާއްވަމުން އަންނަނީ މާންސް ޖަމުއްޔާއާއި އަންބަރު ގްރޫޕް ގުޅިގެންނެވެ.

މުބާރާތް އިންތިޒާމު ކުރާ ފަރާތުން ބުނީ މި މުބާރާތް ބޭއްވުމުގެ މަގުސަދަކީ އއ. އަތޮޅުގައި ވޮލީބޯޅަ ދިރުވައި އާލާކޮށް، ވޮލީ ކުޅޭ ހުނަރުވެރި ކުޅުންތެރިންތަކެއް އުފެއްދުން ކަމަށެވެ.

މީގެ އިތުރުން އަތޮޅު ފެންވަރުގައި ވާދަކުރާނެ ކުޅުންތެރިންތަކެއް އުފެއްދުމާ އެކު އަތޮޅުގެ ޒުވާނުންގެ މެދުގައި އެއްބައިވަންތަކަން ވަރުގަދަކޮށް އެކުވެރި މުޖުތަމައެއް ބުނާކުރުމަކީ ވެސް މި މުބާރާތް ބޭއްވުމުގެ މަގުސަދެއް ކަމަށް މުބާރާތް އިންތިޒާމުކުރާ ފަރާތުން ބުނެފައިވެ އެވެ.