ހަނިޔާ މަރާލާފައިވަނީ "ޝޯޓް ރޭންޖް" ހަތިޔާރަކުން: އީރާން

ހަމާސްގެ ސިޔާސީ ލީޑަރު އިސްމާޢީލް ހަނިޔާ

އީރާނުގެ ރިވޮލިއުޝަނަރީ ގާޑުން ބުނެފައިވާ ގޮތުގައި ހަމާސްގެ ސިޔާސީ ލީޑަރު އިސްމާޢީލް ހަނިޔާ މަރާލާފައިވަނީ، އޭނާގެ ގެއަށް ބޭރުން ދޫކޮށްލި "ޝޯޓް ރޭންޖް" ހަތިޔާރަކުންނެވެ. މި މަރުގެ ޙާދިސާ ހިނގާފައިވަނީ އީރާނުގެ ވެރިރަށް ޓެހެރާނުގައެވެ.

އީރާނުގެ ރިވޮލިއުޝަނަރީ ގާޑުން އިތުރަށް ބުނެފައިވަނީ ހަނިޔާ އަވަހާރަކޮށްލުމާ ގުޅިގެން "ގަދަފަދަ" ޖަވާބެއް ދޭނެ ކަމަށެވެ. މި ބަޔާނާ ގުޅިގެން، އެމެރިކާގެ ޕެންޓަގަނުން ބުނެފައިވަނީ އީރާނުން އިޒްރޭލަށް ޖަވާބުދާރީވެދާނެކަމުގެ އަންދާޒާތައް އިތުރުވަމުންދާތީ، އެމެރިކާގެ މިލިޓަރީން އިތުރު ޖެޓް ފައިޓަރުތަކާއި ހަނގުރާމަ އުޅަނދުތައް އެ ސަރަޙައްދަށް ފޮނުވާނެ ކަމަށެވެ.

މި ޙާދިސާއާ ގުޅިގެން، އިޒްރޭލުގެ ބާރުތަކުން މިހާރު ވަނީ އޮކިއުޕައިޑް ވެސްޓް ބޭންކުގެ ތުލްކަރަމްގައި ރެއިޑްކުރަން ފަށާފައެވެ. މިއީ އެއަރ ސްޓްރައިކެއްގައި ކާރަކަށް އަމާޒުކޮށް މަދުވެގެން 5 މީހުން މަރާލުމަށްފަހުގައެވެ. މެޑިކަލް ސޯސްތަކުން އަލްޖަޒީރާއަށް ބުނެފައިވާ ގޮތުގައި މަރުވި މީހުންގެ ތެރޭގައި ނާބުލުސްގައި ހަމާސްގެ މިލިޓަރީ ވިންގުގެ ލީޑަރެއް ކަމަށްވާ ހައިތަމް ބަލީދީ ހިމެނެއެވެ.

އިޒްރޭލުން ގައްޒާއަށް ކުރަމުންދާ ހަނގުރާމައިގައި މަދުވެގެން 39,550 މީހުން މަރުވެ، 91,280 މީހުންނަށް ޒަޚަމްވެފައިވާކަން ފާހަގަކުރެވެއެވެ. މި ހަނގުރާމަ ފެށުނީ އޮކްޓޯބަރު 7 ގައި ހަމާސްގެ އިސްނެގުމުގައި ކުރި ހަމަލާތަކާ ގުޅިގެންނެވެ. އެ ހަމަލާތަކުގައި އިޒްރޭލުގައި އަންދާޒާކުރެވޭ ގޮތުގައި 1,139 މީހުން މަރުވެ، 200 އަށްވުރެ ގިނަ މީހުން ހައްޔަރުކުރެވުނެވެ.

އީރާން ޣައްޒާ އިސްރާޢީލް