ދިވެހި ސިނަމާގައި ބޮޑު މަގުބޫލުކަމެއް ހޯދަމުން އަންނަ އައު ދިވެހި ފިލްމު "މަގޭ ބިޓުގެ ވެޑިން" ރާއްޖޭގެ އެކި ރަށްރަށުގައި އެޅުވުމުގެ ފުރުސަތު ހުޅުވައިލައިފި އެވެ.
މި ފިލްމު ރަށުގައި އަޅުވަން ބޭނުންވާ ފަރާތްތަކަށް 7971229 ނަންބަރާ ގުޅައިގެން އެ ފުރުސަތު ހަމަޖެއްސޭނެ ކަމަށް ފިލްމު އުފެއްދި ޓީމުން މައުލޫމާތުދެ އެވެ.
މަޖާ އަދި ޝައުގުވެރި ޑްރާމާ ހާދިސާތަކެއްގެ މައްޗަށް ބިނާކޮށް އުފައްދާފައިވާ "މަގޭ ބިޓުގެ ވެޑިން" އަކީ ޝަހުދާ މަހްމޫދު ލިޔެ ޑައިރެކްޓްކޮށްފައިވާ ފިލްމެކެވެ. ބެލުންތެރިންގެ މެދުގައި ބޮޑު ތަރުހީބެއް ލިބެމުން އަންނަ މި ފިލްމަކީ އާއިލާއާ އެކު ބަލާލަން ވަރަށް ކަމުދާނެ އަދި ހިތްހަމަޖެހުން ގެނެސްދޭނެ ފިލްމެކެވެ.
މި ފިލްމުގެ ލީޑް ރޯލުން ފެނިގެންދަނީ މިހާރު ދިވެހި ސިނަމާގެ އެންމެ ވިދަމުން އަންނަ މަގުބޫލު އެކްޓަރު ޝަރަފް އަބްދުﷲ އާއި، މި ފިލްމުން މުޅިން އަލަށް ދިވެހި ސިނަމާއަށް ތައާރަފުވި ހުނަރުވެރި ބަތަލާ ފާތިމަތު ރާޔާ އެވެ. މީގެ އިތުރުން ދިވެހި ސިނަމާގެ ތަޖުރިބާކާރު އަދި ފާހަގަކޮށްލެވޭ މަޝްހޫރު ތަރިން ކަމަށްވާ ޝީލާ ނަޖީބު، އަހުމަދު ސައީދު، ޒަލީޝާން، ނޫރާ، ހާޒިފް އަދި ފުބޫ ވެސް ވަނީ މި ފިލްމުގެ މުހިންމު ރޯލުތަކުން ފެނިގެން ގޮސްފަ އެވެ.
ކޮމެންޓް