ޣައްޒާ ލީޑަރު އަވަހާރަކޮށްލުން ދިވެހި ސަރުކާރުން ކުށްވެރިކޮށްފި

ފަލަސްތީނުގެ މިނިވަން ކަމަށް ޖިހާދު ކުރަމުން އަންނަ ހަމާސް ޖަމާއަތުގެ ސިޔާސީ ލީޑަރު އިސްމާއީލް ހަނިއްޔާ އަވަހާރަކޮށްލި މައްސަލަަ ދިވެހި ސަރުކާރުން ކުށްވެރިކޮށްފިއެވެ.

ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ ހަމާސްގެ ސިޔާސީ ބިއުރޯގެ ޗީފް އިސްމާއިލް ހަނިއްޔާ އީރާނުގައި ހުންނަވަނިކޮށް ބުދަ ދުވަހުގެ ހެނދުނުގެ ވަގުތެއްގައި އަވަހާރަކޮށްލި މައްސަލަ ރާއްޖޭގެ ސަރުކާރުން ހަރުކަށި އިބާރާތުން ކުއްވެރި ކުރާ ކަމަށެވެ.

އަދި ބައިނަލްއަޤްވާމީ ޤާނޫނާއި ބައިނަލްއަޤްވާމީ އިންސާނީ ޤާނޫނު ދަމަހައްޓައި، ޣައްޒާގެ ދަތިކަމަށް އަވަސް އަދި ދެމިއޮންނަ ހައްލެއް ހޯދައި، މި ސަރަޙައްދުގައި ސުލްޙައާއި ހަމަޖެހުން ކަށަވަރުކުރުމަށް ހުރިހާ ޤައުމުތަކަށް ދިވެހި ސަރުކާރުން ވަނީ ގޮވާލާފައެވެ.

ފަލަސްތީނުގެ މިނިވަންކަމަށްޓަކައި ޖިހާދު ކުރަމުންދާ ހަމާސް ޖަމާއަތުގެ ސިޔާސީ ގޮފީގެ އިސްވެރިޔާ އިސްމާއީލް ހަނިއްޔާ ޝަހީދުކޮށްލީ ޔަހޫދީން އީރާނުގެ ވެރިރަށް ތެހެރާންގައި ދިން ހަމަލާއެއްގައެވެ.

މިހަމަލާއާއި ގުޅިގެން ހަމާސްއިން ވިދާޅުވީ ހަނިއްޔާއަށް އަމާޒުކޮށްގެން ދިން މި ހަަމަލާއަކީ އިސްރާއީލުގެ ނިރުބަވެރިން ހިންގި ވަރަށް "ފިނޑި" އަމަލެއް ކަމަށެވެ. ހަމައެއާއެކު އެކަމުގެ ބަދަލު ލުއިކޮށް ކޮށް ނުނަގާނެ ކަމަށާއި، އެކަމުގައި ހިމެނޭ ޔަހޫދީންނަށް ވަރުގަދަ ހަމަލާތަކެއް ދޭނެ ކަމުގެ އިންޒާރުވެސް ވަނީ ދީފައެވެ.

އިރާނުގެ ރައީސް މަސްއޫދު ޕެޒެޝްކިއަން ވަނީ މި ހަމަލާ ކޮށްވެރިކޮށް ހަރުކަށި ފިޔަވަޅު އަޅާނެ ކަމުގެ އިންޒާރު ދެއްވާފައެވެ.

މި ހަމަލާގެ ތަހުގީގު އީރާނުން ފަށާފައިވާއިރު، މިކަމާއި ގުޅޭ މާބޮޑު ތަފްސީލެއް އެއްވެސް ފަރާތަކުން މިހާތަނަށް ހާމަކޮށްފައެއް ނުވެއެވެ.