އިދިކޮޅު ޕާޓީއެއް މިހާރަކު ނެތް - އާދަމް ޝަރީފް

އިދިކޮޅު ޕާޓީއެއްގެ ގޮތުގައި މަސައްކަތް ކުރާނެ އެއްވެސް ޕާޓީއެއް މިހާރު ނެތް ކަމަށް މިނިސްޓަރ އޮފް ސިޓީސް އެންޑް ލޯކަލް ގަވަރނަންސް އާދަމް ޝަރީފް އުމަރު ވިދާޅުވެއްޖެއެވެ.

އާދަމް ޝަރީފް މިހެން ވިދާޅުވީ، ޕީއެންސީ ހަރުގޭގައި މިހާރު ކުރިއަށްދާ ޖަލްސާގައި ވާހަކަފުޅު ދައްކަވަމުންނެވެ.

“މިއަދުވެސް އަޅުގަނޑުމެން މި ޖެހެނީ އިދިކޮޅު ޕާޓީން ކުރަން ޖެހޭ ކަންކަން ކުރަން. އަޅުގަނޑުމެން ވެރިކަމުގައި ތިއްބަސް ރަނގަޅު އޮޕިޒިޝަނެއް އޮންނަން ޖެހޭ - އާދަމް ޝަރީފް

ކޮންގްރެސް ޕާޓީ އަކީ މި ޤައުމުގައި އޮތް އެންމެ ބޮޑު ޕާޓީއަށްވާނެ ކަމަށާއި، ފުއްޕާހަމަކަށް ފެންއެޅީމަ ބޮޑުވާ އުޞޫލުން ޕާޓީ ބޮޑުވަމުން އަންނަ ކަމަށެވެ.

“އަޅުގަނޑުމެން މި ތިބީ ވަރަށް ބަދަހިކޮށް. ރައްޔިތުންނަށް ޚިދުމަތް ކުރުމުގައި ދެމި ތިބޭނަން - އާދަމް ޝަރީފް

ރައީސް ޑރ މުޙައްމަދު މުޢިއްޒުއާ ދިވެހި ރައްޔިތުން ވެރިކަން ހަވާލު ކުރީ ވަރަށް އުއްމީދާ އެކު ކަމަށާއި، ކޮންގްރެސް ޕާޓީ ވެރިކަމަށް ގެނައުމަށް މަސައްކަތް ކުރެއްވި ކޮންމެ މީހެއްގެ އުއްމީދުގައި ކުލަ ޖެހޭނެ ކަމަށްވެސް އާދަމް ޝަރީފް ވިދާޅުވިއެވެ.

" އަދި މިވެރިކަމަށް މިވީ 8 މަސް. ނުވަމަހެއް ނުވޭ . އެހެންވީމަ ކަންބޮޑުވާ ވަރެއް އަދި ނުވޭ. އަޅުގަނޑުމެންނަށްވެސް އެނގޭ ކުދި ކުދި ކަންބޮޑުވުންތައް އެބަ ހުރިކަން. ވަޒީފާތައް ހަމަޖައްސަން ޖެހޭ ފަރާތްތައް އެބަ ތިބިކަން. މި ސަރުކާރަށް އަދި ދެއްވާ ވަގުތުކޮޅެއް. ތިޔަ ރައްޔިތުންގެ އުއްމީދުގައި ކުލަ ޖެހޭނެ - އާދަމް ޝަރީފް ވިދާޅުވިއެވެ.

އިތުރަށް އާދަމް ޝަރީފް ވިދާޅުވީ، ރައީސް ޑރ މުޙައްމަދު މުޢިއްޒަކީ ރައްޔިތުން އެދޭ ގޮތަށް ވެރިކަން ކުރައްވާނެ ބޭފުޅެއް ކަމަށާއި، ރައްޔިތުން ކަންބޮޑުވާން ޖެހޭ އެއްވެސް ކަމެއް ރައީސް ޑރ މުޙައްމަދު މުޢިއްޒު ނުކުރައްވާނެ ކަމަށެވެ.

“ބްރިޖުން ޓޯލް އެއް ނަގާ ކަހަލަ ވާހަކައެއް މިނިސްޓަރަކު ދެންނެވީމަ ރައްޔިތުންގެ ތެރޭގައި ކަންބޮޑުވުންތަކެއް ހުރި. އޭގެ އަނެއް ދުވަހު ރައީސް ޑރ މުޢިއްޒު ވިދާޅުވި އެކަން ކުރަން ވިސްނަވާ ގޮތް - މިނިސްޓަރ ވިދާޅުވިއެވެ.