އެންމެން ރުއްސައިގެން ޤައުމެއް ނުހިންގޭނެ - ސަލީމް

މި ޤައުމުގައި ދިރިއުޅޭ އެންމެން ރުއްސައިގެން މި ޤައުމު ނުހިންގޭނެ ކަމަށާއި، މީސްމިޑިޔާގައި ދައްކާހާ ވާހަކައަކަށް ރައްދު ދޭން ވެއްޖެނަމަ އިތުރު އެއްވެސް ކަމެއް ކުރަން ވަގުތެއް ނޯންނާނެ ކަމަށް އޭދަފުށީ ދާއިރާގެ މެމްބަރު އަޙުމަދު ސަލީމް (ރެޑްވޭވް ސަލީމް) ވިދާޅުވެއްޖެއެވެ.

ސަލީމް މިހެން ވިދާޅުވީ ޕީއެންސީ ހަރުގޭގައި މިހާރު ކުރިއަށްދާ ޖަލްސާގައި ވާހަކަފުޅު ދައްކަވަމުންނެވެ.

“އަޅުގަނޑުމެންގެ ތެރެއިން ގިނަ މީހުން އެބަ ބުނޭ އެއިޑްސް އަކީ ފަރުވާއެއް ނެތް ބައްޔެކޭ. ކެންސަރަކީ ފަރުވާއެއް ނެތް ބައްޔެވޭ. ނަމަވެސް އަޅުގަނޑު ދެކޭ ގޮތުގައި މި ބަލިތަކަށް ފަރުވާ އެބަ އޮތް. ފަރުވާ ނެތީ ހަސަދަވެރިކަމަށް، މީހުން ފަޟީޙަތް ކުރުން ފަދަ ކަންކަމަށް “ ސަލީމް ވިދާޅުވިއެވެ.

އިތުރަށް ވާހަކަފުޅު ދައްކަވަމުން ސަލީމް ވިދާޅުވީ، ރައީސް ޑރ މުޙައްމަދު މުޢިއްޒަކީ ވަރަށް ވިސްނުންތެރި ވެރިއެއް ކަމަށާއި، މި ޤައުމު ހަމައަކަށް އެޅުވުމަށްޓަކައި ރައީސް މުޢިއްޒު ކުރައްވާ މަސައްކަތްތަކަށް ޝުކުރު ހައްޤު ކަމަށެވެ.

“މީހަކު ކަމެއް ރަނގަޅަށް ކުރަންޏާމު ގޮންޖެހުންތައް އަންނާނެ. ކޮންމެވެސް ބަޔަކު ތިބޭނެ ނުރުހޭ. އެންމެން ރުއްސައިގެން ޤައުމެއް ނުހިންނޭ. އަޅުގަނޑުމެން ދާން ޖެހޭނީ ތެދުވެރިކަމާ އެކު - ސަލީމް ވިދާޅުވިއެވެ.

ރައީސް ޑރ މުޙައްމަދު މުޢިއްޒުގެ ވެރިކަމުގައި ސިޔާސީ މަޤާމުތައް އިންތިހާއަށް ގިނަ ކަމަށް ބުނެ އެމްޑީޕީން ދައްކާ ވާހަތަކަށްވެސް ސަލީމް ވަނީ ރައްދު ދެއްވާފައެވެ.

“މި 5 އަހަރު ނިމޭއިރު މި ޤައުމުގެ އެންމެން ތިބޭނީ ވަޒީފާގައި. މި ޤައުމު ހިނގަނީ ރަނގަޅަށް. އެހެންވީމަ ސިޔާސީ މަޤާމުތައް ގިނަވާނެ. އެމީހުންވެސް ރަނގަޅު މުސާރަ އާ މަޤާމުތައް ބޭނުންވާނެ - ސަލީމް ވިދާޅުވިއެވެ.