މަޝްހޫރު ޕްރޮޑަކްޝަން ހައުސް ޑާކަރެއިން އެންޓަޓެއިންމަންޓްގެ ފިލްމު ޖަންނަތުގެ ރަސްމީ ޕޯސްޓަރު ދައްކާލައިފިއެވެ.
އެ ޕޯސްޓަރުގައި ވާގޮތުން އެ ފިލްމު ދިވެހި ސިނަމާއަށް އަންނާނީ އޮގަސްޓު މަހުގެ ތިންވަނަ ދުވަހުގައެވެ.
ޑާކްރެއިން އިން ބުނީ މިހާރު އެ ފިލްމު ބެލުމަށް ޓިކެޓު ވެސް ނެގޭނެކަމަށެވެ.
އެ ޕްރޮޑަކްޝަން ހައިސްއިން ބުނީ ޓެކެޓު ބުކް ކުރުމަށްޓަކައި ޖެހެނީ 9911229 އަށް ވައިބާއިން މެދުވެރިކޮށް މެސެޖެއް ފޮނުވާށެވެ. އަދި އެ މެސެޖުގައި ފިލްމު ބަލަން ބޭނުންވާ ތާރީހާއި ބޭނުންވާ ސީޓުގެ އަދަދުގެ އިތުރުން ގުޅޭނެ ފޯނު ނަންބަރެއް ޖަހަން ޖެހެއެވެ.
އެ ފިލްމުގެ މައިގަނޑު ތަރިންގެ ތެރޭގައި ހިމެނެނީ ޝަރަފު ޢަބްދުﷲ (ޝަރަފް)، އާމިނަތު ޝުހާ، އިސްމާޢީލް ރަޝީދު (ކޮޕީ އިއްސެ)، އާއިދާ، އަންޖީ އަދި ޓައިޓްލް ރޯލުން ފެނިގެންދާ މަހްރީން މުޙައްމަދު ޢަލީއެވެ.
އެ ފިލްމުގެ ޑައިރެކްޓަރަކީ އަލްވަދާއު، އަދި އަލިފާން ފަދަ ކާމިޔާބު ފިލްމުތައް ޑައިރެކްޓްކޮށްފައިވާ އަލީ ޝިފާއު (ޗިއްޕެ) އެވެ.
އެ ފިލްމުގެ ސިނަމެޓޯގްރަފީ ހަދައިފަ ވަނީ ސިނަމެޓޯގްރަފީއަށް އިންގިލާބެއް ގެނުވި ބިބީ ފިލްމުގެ ސިނަމެޓޯގްރަފީ ހަދައިފައިވާ އަހުމަދު ޒިފާފު އެވެ.
ޖަންނަތުގެ ފުރަތަމަ ޓީޒާ ވަނީ މިދިޔަ ހަފުތާގެ ތެރޭގައި އާންމުކޮށްފައެވެ. ފުރަތަމަ ޓީޒާއިން ފެންނަ ގޮތުގައި އެ ފިލްމުގެ ބަތޮލު ޝަރަފް ފެންނަނީ ނުކުޅެދުންތެރިކަން ހުންނަ މީހެއްގެ ގޮތުގައެވެ. އަދި އެ ޓީޒާއިން ފެންނަ ގޮތުގައި މަގުމަތިން ހިނގައިފައި ދަމުން އޭނާގެ ދަރިފުޅާއެކު ހިތުން ނަވަތައިގެ ބޮޑެތި ނަންބަރުތައް ކިޔައެވެ.
މިލިއަނުން މަތީގެ އަދަދުތައް ހިތުން ދެބަފައިން ކިޔަމުން ދާތަން ޓީޒާއިން ފެންނައިރު ޝަރަފް އަކީ ނުކުޅެދުންތެރިކަން ހުރި ނަމަވެސް ތޫނުފިލު މީހެއްކަން އެ ޓީޒާއިން ދައްކުވައިދެއެވެ.
މީގެ އިތުރުން ބައްޕަގެ ނުކުޅެދުންތެރިކަމާއެކު ވެސް ބައްޕަދެކެ ދަރިފުޅު ވާ ލޯބި އެ ޓީޒާއިން ދައްކުވައިދެއެވެ.
އެހެންކަމުން މި ފިލްމަކީ ތަފާތު ރީތި ފިލްމަކަށް ވާނެކަމަށް ގިނަ ބެލުންތެރިން ލަފާކުރެއެވެ. އަދި ގިނަ ބަޔަކު ތިބީ އެ ފިލުމު ބެލުމަށް ކެތްމަދުވެފައެވެ.
ކޮމެންޓް