ހަނގުރާމަ ހުއްޓާލުމުގެ އެއްބަސްވުމާ މެދު ނަތަންޔާހޫ ސީރިއަސްއެއް ނޫން – ހަމާސް

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެމެރިކާގެ ކޮންގްރެސްގައި ދެއްކެވި ވާހަކަފުޅުން ދޭހަވަނީ، ހަނގުރާމަ ހުއްޓާލުމާ މެދު ނަތަންޔާހޫ ސީރިއަސް ނޫން ކަމަށް ހަމާސުން ބުނެފިއެވެ. ހަމާސުން ބުނެފައިވަނީ ހަނގުރާމަ ނިމުމަކަށް ގެނައުމަށާއި އަސީރުން ދޫކޮށްލުމާ މެދު އެއްބަސްވުމަކަށް އައުމަށް ކުރަމުންދާ ހުރިހާ މަސައްކަތެއް ނަތަންޔާހޫ ނާކާމިޔާބުކޮށްލާފައިވާ ކަމަށެވެ.

ނަތަންޔާހޫ އެމެރިކާގެ ގާނޫނު ހަދާ މަޖިލީހުގެ މެމްބަރުންނާ މުހާތަބު ކުރައްވަމުން ގެންދަވަނިކޮށް ވޮޝިންޓަން ޑީސީ ކައިރިއަށް އިސްރާއީލުން ޣައްޒާގައި ހިންގާ ގަތުލުއާންމާ ދެކޮޅަށް އާއްމުން އެއްވެ ވަނީ މުޒާހަރާކޮށްފައެވެ. އާއްމުންގެ ރުޅިވެރިކަން އިތުރުވެފައިވަނީ ޣައްޒާގެ ރައްޔިތުންގެ ހާލަތު ނިހާޔަތަށް ގޯސްވެ، ހަނގުރާމާ ހުއްޓާލުމާއި ގައިދީން މިނިވަން ކުރުމުގެ އެއްބަސްވުން ފެއިލްވެފައިވާތީއެވެ.  

ޣައްޒާ ސަރުކާރުގެ މީޑިއާ އޮފީހުން ބުނެފައިވަނީ އިސްރާއީލުގެ ސިފައިން ހަމަލާތަކުން، ޚާން ޔޫނުސްގެ ސަލާހު އަލްދީން މަގުގައި، ޒަހަމްވި މީހުން ސަލާމަތް ކުރަން މަސައްކަތްކުރާ ސިއްހީ އެހީތެރިންނަށް އަމާޒުކޮށް ޑްރޯންތަކުން ހަމަލާކަމަށެވެ.  އަދި ސިއްހީ އެހީތެރިންނަށް އެމީހުންގެ މަސައްކަތްތައް އަދާކުރުމަށް ގަސްތުގައި ހުރަސް އަޅަމުންދާ ކަމަށެވެ.

އިސްރާއީލުން އެންމެ ފަހުން ޣައްޒާއަށް ދިން ޙަމަލާގައި، ޚާން ޔޫނުސްގެ ދެކުނުގައި ފަލަސްޠީނުގެ 129 މީހުން ޝަހީދުވެ، އެތައް ސަތޭކަ ބަޔަކު ޒަޚަމްވެފައިވާއިރު، ގާތްގަނޑަކަށް 150،000 އެއްހާ ރައްޔިތުން ވަނީ ޣައްޒާ ދޫކޮށް އެހެންތަންތަނަށް  ހިޖުރަކުރަން މަޖުބޫރުވެފައެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި ޣައްޒާގެ 39،145  މީހުން ވަނީ ޝަހީދުވެފައެވެ. އަދި 90،257 މީހުން ޒަޚަމްވެފައިވެއެވެ. އޮކްޓޯބަރު މަހުގެ ހަތް ވަނަ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަރުވި މީހުންގެ އަދަދު 1،139 އަށް އަރާނެ ކަމަށް ލަފާކުރެވޭއިރު، އަދިވެސް އިސްރާއީލުގެ ދިހަވަރަކަށް މީހުން ޣައްޒާގައި ރަހީނުކޮށްފައިވެއެވެ.