ފަންސާސް ހާސް ރުފިޔާއިން ފެނަކަ ޖޫރިމަނާ ކޮށްފި

މޯލްޑިވްސް ޔުޓިލިޓީ ރެގިއުލޭޓަރީ އޮތޯރިޓީން އިން ފެނަކަ ކޯރޕަރޭޝަން ފަންސާސް ހާސް ރުފިޔާއިން ޖޫރިމަނާ ކުރަން ނިންމައިފިއެވެ.

ފެނަކަ ޖޫރިމަނާ ކޮއްފައިވަނީ މިދިޔަ މޭ މަހުގެ 23 ވަނަ ދުވަހު ރ. އުނގޫފާރުގައި ހިނގި ކަރަންޓު ގެ ހާދިސާގައި އުމުރުން 18 އަހަރުގެ ޒުވާނަކު ނިޔާވުމުންނެވެ.

ފެނަކައިގެ އިހުމާލުން ހިނގާފައިވާ މި ހާދިސާ ގައި 2 ކުޑަކުދިންނަށް އަނިޔާ ލިބިފައިވެއެވެ. އަދި އެ ކުދިން ސަލާމަތްކުރަން އުޅުނު މީހާ މަރުވި ހާދިސާއާ ގުޅިގެން ފެނަކަ ކޯޕަރޭޝަންގެ އިހުމާލު އޮތުމުން އެ ކުންފުނިން 50،000ރ. އިން ޖޫރިމަނާ ކުރަން މޯލްޑިވްސް ޔުޓިލިޓީ ރެގިއުލޭޓަރީ އޮތޯރިޓީން މިއަދު ނިންމައިފި އެވެ.

ޔުޓިލިޓީ ރެގިއުލޭޓަރީ އޮތޯރިޓީން މިއަދު ނެރުނު ބަޔާނެއްގައި ބުނީ މި ހާދިސާ ހިނގި ގޮތް ބެލިއިރު، ހާދިސާ ހިނގަން މެދުވެރިވީ މަގު ބައްތިތަކުގައި ހުންނަންޖެހޭ ސަލާމަތީ އިކުއިޕްމަންޓްތަކުގެ ތެރޭގައި ހިމެނޭ އާތު ލީކް ސާކިޓް ބްރޭކަރާއި މިނިއޭޗާ ސާކިޓް ބްރޭކަރު ހަރުކޮށްފައި ނުވާތީކަން ކަމަށެވެ. އަދި ފެނަކައިން ހިދުމަތް ދެމުން އަންނަ ގިނަ ރަށްތަކުގައި މަގުބައްތިތައް ދިއްލަމުން ދަނީ އާތު ލީކް ސާކިޓް ބްރޭކަރު ހަރުނުކޮށް ކަން ތަހުގީގަށް އެނގިފައިވާ ކަމަށް ވެސް ބަޔާނުުގައި ބުނެފައިވެ އެވެ.