ފަލަސްޠީނުގެ ޖަމާޢަތްތައް ޗައިނާގެ އެހީއާއެކު އެއްބައިވަންތަކަމުގެ ސަރުކާރެއް ބިނާކުުރުމުގެ އެއްބަސް ވުމަކަށް

ފަލަސްޠީނުގެ ސިޔާސީ މައިގަނޑު ދެ ޖަމާޢަތް ކަމަށްވާ ހަމާސް އާއި ފަތާހް ވަނީ ޗައިނާގެ އެހީއާއެކު އެއްބައިވަންތަކަމުގެ ސަރުކާރެއް ބިނާކުުމުގެ އެއްބަސް ވުމެއްގައި ސޮއިކޮއްފައެވެ. އަދި މި ދެ ޖަމާޢަތުގެ އިތުރުން، އިތުރު 12 ޖަމާޢަތަކުން ވެސް ވަނީ މި އެއްބަސް ވުމުގައި ސޮއި ކުރައްވާފައެވެ.

ފަލަސްޠީނުގެ އެކި ޖަމާޢަތްތަކުގެ ސިޔާސީ ލީޑަރުންނާއިއެކު، މިއަދު ޗައިނާގެ ވެރިރަށް ބެއިޖިންގައި ބޭއްވި މަޝްވަރާތަކަށްފަހު، ޣައްޒާގައި ހިނގަމުންދާ ގަތުލުއާންމު ނިމުމުން ޣައްޒާގައި” ވަގުތީ ގައުމީ އެއްބައިވަންތަކަމުގެ ސަރުކާރެއް" އެކުލަވާލުމުގެެ އެއްބަސްވުމެއްގައި ސޮއިކޮށްފައި ވަނީ ޗައިނާގެ އިސްނެގުމުގެ ދަށުންނެވެ.

ފަލަސްޠީނު ނެޝަނަލް އިނީޝިއޭޓިވްގެ ސެކްރެޓަރީ ޖެނެރަލް ، މި އެއްބަސްވުމުގައި ސޮއިކުރި 14 ޕާޓީގެ ތެރެއިން އެއް ޕާޓީގެ ވެރިޔާ، މުސްޠަފާ ބަރުޣޫތީ، އަލްޖަޒީރާއަށް ވިދާޅުވެފައިވަނީ މި އެއްބަސްވުމަކީ ފާއިތުވި އަހަރުތަކުގައި ވެވުނު އެހެން އެއްވެސް އެއްބަސްވުމަކަށްވުރެ "މާ ފުޅާ" އެއްބަސްވުމެއް ކަމަށެވެ.

އަދި ހަމައެހެންމެ، މުސްޠަފާ ބަރުޣޫތީ ބުނިގޮތުގައި މި މަޝްވަރައިގެ މައިގަނޑު ހަތަރު ބައިކަމުގައިވަނީ ވަގުތީ ގައުމީ އެއްބައިވަންތަކަމުގެ ސަރުކާރެއް ގާއިމުކުރުމާއި، ކުރިއަށް އޮތް އިންތިޚާބުތަކަށް ތައްޔާރުވުމުގެ ގޮތުން އެއްވެފައިވާ ފަލަސްތީނު ލީޑަރޝިޕެއް އުފެއްދުމާއި، އައު ފަލަސްތީނު ނެޝަނަލް ކައުންސިލެއް މިނިވަން އިންތިޚާބަކުން ހޮވުމާއި، އަދި އިސްރާއީލުގެ ދެމިގެންދާ ހަމަލާތަކާ ކުރިމަތިލުމަށް އާންމު އެއްބައިވަންތަކަމުގެ އިއުލާނެއް ކުރުމެވެ.

މި މަޝްވަރާތަކުގެ އެންމެ ފަހު ބުރުގައި ހަމާސްގެ ސިޔާސީ ލީޑަރު އިސްމާއިލް ހާނިއްޔޭ އާއި ފަތާހްގެ ޑެޕިއުޓީ ލީޑަރު މަހްމޫދު އަލް އަލޫލް ބައިވެރިވަޑައިގަތެވެ.

ފަލަސްތީނުގެ ވާދަވެރި ދެ ޖަމާއަތް ކަމަށްވާ ހަމާސްއާއި ފަތާހް އެއްގަލަކަށް އެރުމަކީ ފަލަސްތީނުގެ އެއްބައިވަންތަކަމާއި މިނިވަންކަން ހޯދުމަށް އެޅޭ މުހިންމު ފިޔަވަޅެއް ކަމަށް ތަޖުރިބާކާރުން ބުނެއެވެ.

މިދިޔަ އޭޕްރިލް މަހު ވެސް ޗައިނާއިން ވަނީ ހަމާސްއާއި ފަތާހްގެ އޮފިޝަލުން އެއް މޭޒެކަށް ގެނެސްފައެވެ. އެ ގައުމުން ދެކޭ ގޮތުގައި ފަލަސްތީނުގެ މައްސަލަ ހައްލު ކުރެވޭނީ ފަލަސްތީނާއި އިސްރާއީލުގެ ދެ ދައުލަތެއް އޮވެގެންނެވެ.