މޯލްޑިވްސް ކަރެކްޝަނަލް ސާވިސް (އެމްސީއެސް) ގެ އިންސްޓިޓިއުޓް ފޯ ކަރެކްޝަނަލް ސްޓަޑީޒް (އައިކޯސްޓް) އިން ހިންގާ "ޑިޕްލޮމާ އިން ކަރެކްޝަނަލް މެނޭޖުމެންޓް" ކޯހުގެ ތިން ބެޗު އެއްކޮށް ފަށައިފި އެވެ.
ކަރެކްޝަނުން ބުނީ އިއްޔެ ފެށި މި ކޯހުގެ 6،7 އަދި 7 ވަނަ ބެޗުގައި ޖުމުލަކޮށް 115 އޮފިސަރުންނާއި މުވައްޒަފުން ބައިވެރިވެފައިވާ ކަމަށެވެ.
އެއް އަހަރު ދުވަހުގެ މުއްދަތަށް ކުރިއަށްދާ މި ކޯސް ފަރުމާކޮށްފައިވަނީ އެމްސީއެސްގެ މަސައްކަތްތަކަށް ހާއްސަކޮށެވެ.
ކޯހުގެ މައިގަނޑު މަގުސަދަކީ ޕްރިޒަން އޮފިސަރުންނަކީ ތައުލީމީ ގޮތުންނާއި ހުނަރުގެ ގޮތުން ގާބިލު ބަޔަކަށް ހެދުމާއި، މެނޭޖުމެންޓް ލެވަލްގައި ދިމާވާ މައްސަލަތައް ހައްލު ކުރާނެ ގޮތްތައް ދަސްކޮށްދިނުމެވެ.
މިއީ ރާއްޖޭގައި މިދާއިރާ އިން ހިންގާ ފުރަތަމަ ކޯހެވެ.
މިކޯސް ފުރިހަމަކުރާ ފަރާތްތަކަށް މޯލްޑިވްސް ކޮލިފިކޭޝަން އޮތޯރިޓީއިން ލެވެލް 5 ގެ ފެންވަރަށް ބަލައިގަންނަ ސެޓްފިކެޓެއް ލިބޭނެ އެވެ.
މި ކޯހުގެ މޮޑިއުލްތައް ކިޔަވައިދޭނީ އައިކޯސްޓްގެ މުދައްރިބުންނާއި އެމްސީއެސްގެ ފަންނީ ބައެއް އޮފިސަރުންނާއި ސިވިލް މުވައްޒަފުންނެވެ.
ކޮމެންޓް