ބޭންކް އޮފް މޯލްޑިވްސް (ބީއެމްއެން) އިން އިން 'ވީރަން މޯލްޑިވްސް' އާ އެކު، ޕާޓްނާޝިޕެއް ގާއިމުކޮށްފި އެވެ.
ބީއެމްއެލުން ބުނީ މި އެއްބަސްވުމަކީ ކުންފުނިތަކާއި މުއައްސަސާތަކާ ޖަމިއްޔާތަކުގެ މެދުގައި ދުޅަހެޔޮ ދިރިއުޅުމާއި ގުޅިގެން މަސައްކަތް ކުރުމުގެ ރޫހު އާލާ ކުރުމަށް ވީރަން މޯލްޑިވްސުން އިންތިޒާމު ކޮށްގެން ބާއްވާ ކޯޕަރޭޓް ރަންއަށް އެއްބާރުލުން ދިނުމުގެ ގޮތުންވި އެއްބަސްވުމެއް ކަމަށެވެ.
މި ޕާޓްނާޝިޕްގެ ދަށުން ކުރިއަށް އޮތް ދެ އަހަރު ދުވަހު މި ހަރަކާތް އިންތިޒާމުކޮށް ކުރިއެރުވުމަށް ބޭންކުން ވީރަން މޯލްޑިވްސްއަށް އެހީތެރިކަން ފޯރުކޮށްދޭނެ އެވެ.
ވީރަން މޯލްޑިވްސުން ބާއްވާ ފުރަތަމަ ދުވުން މިއަހަރު ބާއްވާ އެވެ.
މި ހަރަކާތަކީ ރާއްޖޭގައި ހިންގާ ކުންފުނިތަކާއި، މުއައްސަސާތަކާ އަދި ޖަމިއްޔާ ޖަމާއަތްތަކަށް ހާއްސަ ކޮށްގެން ފަރުމާކޮށްފައިވާ ކޮންމެ ޓީމެއްގައި 5 ދުވުންތެރިން ހިމެނޭ، ކޮންމެ ދުވުންތެރިއަކު 1 ކިލޯމީޓަރު ދުވަންޖެހޭ ރިލޭ ރޭހެކެވެ.
އެގޮތުން މި ރޭހަކީ ކުޅިވަރުގެ ވާދަވެރިކަމާއި ކޯޕަރޭޓް ވަކިވަކި ސިފަތައް އެކުލެވޭ، ޓީމް ރޫހު ވަރުގަދަ ކުރުމަށާއި ދުޅަހެޔޮ ދިރިއުޅުމަކަށް ބާރުއެޅުމަށް ލިބޭ ފުރުސަތެކެވެ.
ބީއެމްއެލުން ދަނީ ގައުމީ ފެންވަރުގެ މަޝްރޫއުތަކާއި، ސްޓްރެޓީޖިކް ޕާޓްނާޝިޕްތަކާއި، ޒުވާނުން ބާރުވެރިކުރުވުމާއި، މަސައްކަތުގެ މާހައުލުގައި ދުޅަހެޔޮކަން އިތުރުކުރުމާއި، މުޅި ރާއްޖޭގައި ކުޅިވަރު ކުރިއެރުވުމަށް މެދުކެނޑުމެއްނެތި އެހީތެރިކަން ފޯރު ކޮށްދެމުންނެވެ.
ކޮމެންޓް