ދިވެހި ފިލްމު ޕަރީ ގެ ދެވަނަ ޗެޕްޓާ އެ ފިލްމުގެ ފުރަތަމަ ޗެޕްޓާއަށްވުރެ މާ ފުރިހަމަ ކަމަށް ފިލްމު ބެލި ގިނަ ބަޔަކު ބުނަން ފަށައިފި އެވެ.
އަލީ ސީޒަން އަދި އަހުމަދު އަހުސަން ޕްރޮޑިއުސްކުރި ބިރުވެރި ފިލްމު ޕަރީ ވަނީ ގިނަ ބައެއްގެ މަގުބޫލުކަން ހޯދައިފަ އެވެ.
މިއަހަރުގެ ކުރީކޮޅު ޕަރީގެ ފުރަތަމަ ޗެޕްޓާ ޕްރިމިއާ ކުރިއިރު، އެ ޗެޕްޓާ ވެސް ވެފައިވަނީ ދިވެހި ފިލްމީ އިންޑަސްޓްރީއަށް އިންގިލާބީ ބަދަލުތަކެެއް ގެނުވި ޗެޕްޓާ އަކަށެވެ.
އެ ޗެޕްޓާއަކީ ބޭރުގެ ކުންފުންޏެއް ލައްވައި ވީއެފްއެކްސް ހެދުވި ފުރަތަމަ ފިލްމެވެ. ލަންކާގެ މޭކަޕް އާޓިސްޓުންނާއި ޝޫޓިން ކުރޫގެ އެހީތެރިކަން މި ފިލްމަށް ހޯދާފައިވާއިރު، ސީޖީއައިއާ ވިޝުއަލް އިފެކްޓްސް އަދި 7.1 ސަރައުންޑް ސައުންޑް މިކްސިންގެ މަސައްކަތް ކުރިއަށް ދިޔައީ އިންޑިއާގެ މަޝްހޫރު ސްޓޫޑިއޯތަކުގަ އެވެ.
ފުރަތަމަ ޗެޕްޓާގެ ފުރިހަމަ ކަމާ އެކު ދެވަނަ ޗެޕްޓާ ބަލަން ދިޔަ ގިނަ ބަޔަކު ބުނީ ދެވަނަ ޗެޕްޓާ އަދި ފުރަތަމަ ޗެޕްޓާއަށްވުރެ މާ ފުރިހަމަ ކަމަށެވެ.
އެގޮތުން ދެވަނަ ޗެޕްޓާގައި ފިލްމުގެ މަންޒަރުތަކާއި ޓެކްނިކަލް މަސައްކަތްތައް ފުރިހަމަ ކުރުމަށް ވަރަށް ބޮޑު އިސްކަމެއް ދީފައިވާކަން އެތައް ބަޔަކު ފާހަގަކުރި އެވެ.
މީގެ އިތުރުން އެ ފިލްމުގައި ބޮލީވުޑްގެ މަޝްހޫރު އެކްޓްރެސް ސުރުޖާސިކާ ދާސް ވަނީ ދައްކާލައިފަ އެވެ.
ޕަރީއަކީ ސްރީލަންކާއަށް ދަތުރުކުރި ދިވެހި އާއިލާއަކަށް ދިމާވި ބިރުވެރި ހާދިސާތަކެއްގެ މައްޗަށް ބިނާކޮށް ހަދާފައިވާ ފިލްމެކެވެ. އެ ފިލްމުގައި ރިޝްމީ ރަމީޒް، ޝީލާ ނަޖީބް، އަލީ ސީޒަން، ޖުމައްޔިލް ނިމާލް، އަދި މުހައްމަދު ނައުޝާދު އަލީ ފަދަ ކުޅަދާނަ ފަންނާނުން ހިމެނެ އެވެ.
ކޮމެންޓް