ރިޔާސީ އިންތިހާބާއި މަޖިލިސް އިންތިހާބު އެއްކޮށް ބާއްވަން ޖެހޭ - ރައީސް

ރިޔާސީ އިންތިހާބާއި މަޖިލިސް އިންތިހާބު އެއްކޮށް ބާއްވަން ޖެހޭ ކަމަށާއި އެކަމަށް މަގުފަހި ކުރުމަށް ގާނޫނު އަސާސީއަށް އިސްލާހު ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މިހާރު ކުރިއަށްދާ ޕީއެންސީގެ ޖަލްސާއެއްގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރައްޔިތުންނަށް އެންމެ ފައިދާވާ ގޮތައް ހަރަދު ދެކޮޅު ޖެހޭ ގޮތައް އިންތިހާބުތައް ބާއްވަން ޖެހޭ ކަމަށެވެ.

ރައީސް ވިދާޅުވީ ރައްޔިތުންގެ މަޖިލިސް އިންތިހާބަށް 125 މިލިއަން ރުފިޔާ ހަރަދުވި ކަމަށާއި ރިޔާސީ އިންތިހާބަށް 180 މިލިއަން ރުފިޔާ ހަރަދުވި ކަމަށެވެ. "ރިޔާސީ އިންތިހާބާއި މަޖިލިސް އިންތިހާބު އެއްކޮށް ބާއްވަން އެބަޖެހޭ. އޭރުން 120 މިލިއަން ރުފިޔާ ސަލާމަތް ކުރެވޭނެ. އެފައިސާ އިން ކުޑަ ރަށެއްގެ ރައްޔިތުން ދާއިމަށް ބޮޑު ރަށަކަށް ބަދަލުކުރުން ކަމަށް ވީނަމަވެސް އެކަން ކުރެވޭނެ. މިދެއިންތިހާބު އެއްކޮށް ބާއްވާނަމަ ރައްޔިތުންނަށް ވެސް ވަރަށް ބޮޑަށް ފަސޭހަ ވާނެ." ރައީސް ވިދާޅުވިއެވެ.

ރައީސް ވިދާޅުވީ އިންތިހާބުތައް އެއްކޮށް ބޭއްވުމަށް ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭ ކަމަށާއި އެކަން ކުރަން ޖެހޭ ކަމަށެވެ.

ރައީސް ވިދާޅުވީ ޤާނޫނު އަސާސީއަށް އިސްލާހު ގެންނަން މިއަހަރު ނުވަތަ އެންމެ ލަސްވެގެން އަންނަ އަހަރު ހުށަހަޅުއްވާނެ ކަމަށެވެ.

ރައީސް ވިދާޅުވީ އިޤުތިޞާދު އަނދަވަޅުގެ ވާހަކަ ނޮވެމްބަރ 17 ގައި ދެންނެވިން ކަމަށާއި އެމަނިކުފާނު ކުރަން ނިންމި ގޮތައް ކުރަން ރޭވި ގޮތައް ކަންތައްތައް ދަނީ ކުރެވެމުން ކަމަށެވެ. "ހަމަމަގުން ގައުމު ކުރިއަށް ގެންދިއުމަށް ބަދަހިކަމާއި އެކުވެރިކަން ވަރަށް މުހިއްމު. އަޅުގަނޑުމެންނަށް އެންމެ މުހިއްމީ ދިވެހިރައްޔިތުން އެދޭގޮތައް ގައުމުގެ ކަންކަން ކުރުން." ރައީސް ވިދާޅުވިއެވެ.

ރައީސް ވިދާޅުވީ މިއަދު ކުއްލިއަކަށް ކަމެއް ވިސްނިގެން ކަންކަން ކުރުމުގެ ވިސްނުމެއް ނުގެންގުޅުއްވާ ކަމަށާއި މެނިފެސްޓޯގައި އެއޮތީ ކަންކަން ކުރާނެގޮތް ލިޔެފައި ކަމަށެވެ. "ހަރަދު ކުޑަކުރާ ވާހަކަ ދައްކާއިރު ގައުމަށް ކަތާވަރަށް ނިޒާމީ ބަދަލުތައް ގެންނަ ވާހަކަ ދައްކަން އެބަޖެހޭ. ވަރަށް ގިނަ އިންތިހާބުތައް އެބައޮތް." ރައީސް ވިދާޅުވިއެވެ.