ފަލަސްތީނުގެ ސްކޫލަކަށް އިސްރާއީލުން ދިން ހަމަލާއެއްގައި 16 މީހުން ޝަހީދުވެއްޖެ

މެދުތެރޭ ޣައްޒާގެ އަލް ނޫސެއިރާތުގައި، ގެދޮރު ގެއްލިފައިވާ ފަލަސްތީނުގެ މީހުންނަށް ހިޔާވަހިކަން ދެމުން އަންނަ ސްކޫލަކަށް އިސްރާއީލުން ދިން ހަމަލާއެއްގައި 16 މީހުން ޝަހީދުވެފައިވާ ކަމަށް ފަލަސްތީނުގެ ރަސްމީ ނޫސް އެޖެންސީން ހޮނިހިރު ދުވަހު ވަނީ ބުނެފި އެވެ.

އިސްރާއީލުގެ އަސްކަރިއްޔާއިން ބުނެފައިވަނީ އެ މައްސަލަ ބަލަމުން އަންނަ ކަމަށެވެ.

ފަލަސްތީނުގެ ހެލްތު މިނިސްޓްރީން ބުނެފައިވަނީ އެ ސްކޫލަށް ދިން ހަމަލާގައި 16 މީހުން ޝަހީދުވެ 50 އަށް ވުރެ ގިނަ މީހުން ޒަޚަމްވެފައިވާ ކަމަށެވެ.

ޣައްޒާގެ ސިވިލް އިމަޖެންސީ ސާވިސްގެ ތަރުޖަމާނު މަހްމޫދު ބާސަލް ވިދާޅުވީ ޒަހަމްވި މީހުންގެ ތެރެއިން ގިނަ ބައެއްގެ ހާލު ސީރިއަސްކަމުން މަރުވި މީހުންގެ އަދަދު އިތުރުވުމަކީ އެކަށީގެންވާ ކަމެއް ކަމަށެވެ.

އޭނާ ވިދާޅުވީ، ސްކޫލަށް ދިން ހަމަލާގެ މާނައަކީ ގެދޮރު ދޫކޮށް ހިޔާވަހިކަން ހޯދަން ނުކުންނަ އާއިލާތަކަށް ހަނގުރާމާގައި އެއްވެސް ތަނެއް ރައްކާތެރި ނޫން ކަމަށެވެ.

ޣައްޒާގެ ތާރީޚީ 8 ރެފިއުޖީ ކޭމްޕްގެ ތެރޭގައި ހިމެނޭ އަލް ނުސައިރަތަކީ މިދިޔަ ހޮނިހިރު ދުވަހު އިސްރާއީލުން ބޮން ގޮއްވާލި ތަނެވެ. މީގެ ކުރިން ވެސް އެ ކޭމްޕުގެ ގެއަކަށް ދިން ވައިގެ ހަމަލާއެއްގައި 10 މީހުން ޝަހީދުވެ އެތައް ބަޔަކު ޒަހަމްވެފައިވާ ކަމަށް ސިއްހީ އެހީތެރިން ބުނެ އެވެ.

ނުވަ މަސް ދުވަސްވެފައިވާ މި ހަނގުރާމައިގައި ޝަހީދުވާ މީހުންގެ މައުލޫމާތު ކޮންމެ ދުވަހަކު އަޕްޑޭޓް ކުރަމުން އަންނަ ޣައްޒާގެ ސިއްހަތާ ބެހޭ ވުޒާރާއިން ބުނީ ފާއިތުވި 24 ގަޑިއިރުގެ ތެރޭގައި އިސްރާއީލުން ދެމުންދާ ހަމަލާތަކުގައި ފަލަސްތީނުގެ 29 މީހަކު ޝަހީދުވެ، 100 މީހުން ޒަޚަމްވެފައިވާ ކަމަށެވެ.

ޣައްޒާސަރުކާރުގެ މީޑިއާ އޮފީހުން ބުނީ، ވައިގެ ހަމަލާތަކުގައި ޝަހީދުވި މީހުންގެ ތެރޭގައި ޣައްޒާގެ ފަސް ނޫސްވެރިން ވެސް ހިމެނޭ ކަމަށާއި، އޮކްޓޯބަރު މަހުގެ 7 ވަނަ ދުވަހުން ފެށިގެން ޝަހީދުވި ނޫސްވެރިންގެ އަދަދު 158 އަށް އަރާފައިވާ ކަމަށެވެ.

އިސްރާއީލުގެ ހަމަލާތަކުގައި ފަލަސްތީނުގެ 38،000 އަށް ވުރެ ގިނަ މީހުން ޝަހީދުވެފައިވާ ކަމަށް ޣައްޒާގެ ސިއްހީ އިދާރާތަކުން ބުނެ އެވެ. ހަމާސް ޖަމާއަތް ނައްތާލުމުގެ މަގްސަދުގައި އިސްރާއީލުން މިދިޔަ އޮކްޓޯބަރު މަހުގެ ހަތް ވަނަ ދުވަހު ފެށި އޮޕަރޭޝަންގައި، ހަމާސް ޖަމާއަތުން އިސްރާއީލަށް ދިން ހަމަލާތަކުގައި 1،200 މީހުން މަރުވެ، 250 އަށް ވުރެ ގިނަ މީހުން ރަހީނުކޮށްފައިވާ ކަމަށް އިސްރާއީލުގެ ސިފައިން ބުނެއެވެ.