21 ވަނަ ދުވަހު ނިކުމެ ޙުސްނީ އަށް ވޯޓުއަޅާ ފޮށިތައް ފުރާލާނަން - ޖީދޭ

އަންނަ އާދިއްތަ ދުވަހު މަނަދޫ ދާއިރާގެ ރައްޔިތުން ނިކުމެ، ޙުސްނީ މުބާރިކަށް ވޯޓުއަޅާ ވޮޓު ފޮށިތައް ފުރާލާނެ ކަމަށް އެމްޑީޕީގައި ގިނަ އެތައް އަހަރުތަކެއް ހޭދަކުރެއްވުމަށްފަހު ދާދިފަހުން ޕީއެންސީއާ ގުޅިވަޑައިގެންނެވި ޙުސައިން ނަޒީދު ވިދާޅުވެއްޖެއެވެ. 

ރައީސް ޑރ މުޙައްމަދު މުޢިއްޒު  ވެފައިވާ ވަޢުދުތައް ފުއްދުމަށްޓަކައި މި ދާއިރާގެ ގޮނޑި މި ސަރުކާރަށް ވަރަށް  މުޙިއްމު ކަމަށާއި، މި އިންތިހާބުގައި މަނަދޫ ދާއިރާގެ ރައްޔިތުން ނިކުމެ އެ ނިންމުން ނިންމާނެ ކަމަށެވެ. 

މާފަރަށްވެސް ވެފައިވާ ވަޢުދުތައް މިހާރުވެސް ފުދެމުން އަންނަ ކަމަށާއި، ލަންދޫ ޒުވާނުންގެ ކަންބޮޑުވުންތަކަށްވެސް ހައްލު ހޯދައިދެއްވާނީ މި ސަރުކާރުން ކަމަށް ނަޒީދު ވިދާޅުވިއެވެ. 

ބެރު ދުންމާރި ފުމޭ މަޖިލީހެއް އޮންނަން ބޭނުން ނުވާ ކަމަށާއި 21 ވަނަ ދުވަހު ނިކުމެ މި އިންތިހާބު ކާމިޔާބު ކުރާނީ ބޮޑުތަނުން ކަމަށް ނަޒީދު ވިދާޅުވިއެވެ. 

ގިނަ އަދަދެއްގެ ބަޔަކާއެކު ފެށި މި ޖަލްސާ ހިނގަމުންދަނީ މަނަދޫގެ ބަނދަރު ސަރަހައްދުގައެވެ. ރައްޔިތުންގެ މަޖިލީހުގެ އިންތިހާބު އަންނަ އާދިއްތަ ދުވަހު ބޭއްވުމަށް ހަމަޖެހިފައިވާއިރު، ދާއިރާގެ ތިން ރަށުންވެސް ބުނަމުން ދަނީ މި ދާއިރާގެ ގޮނޑި މިފަހަރު ދޭނީ ސަރުކާރަށް ކަމަށެވެ. މަނަދޫ ދާއިރާގައި ހިމެނޭ މާފަރު މަނަދޫ ލަންދޫންވެސް ޙުސްނީއަށް ބޮޑު ތާޢީދެއް އޮތްއިރު، ދާދިފަހުން ވަނީ ލަންދޫ އަދި މާފަރުގައިވެސް ކެމްޕެއިން ބޮޑު ޖަލްސާއެއް ބާއްވާފައެވެ. 

ޙުސްނީ އަކީ ޤާނޫނީ ދާއިރާގައި 13 އަހަރުގެ ތަޖުރިބާ ހުރި ޢިލްމީ ޤާބިލް ބޭފުޅެކެވެ. މުޅި ދާއިރާއަށް ޙުސްނީ ވަޢުދުވެލައްވަނީ، ދިވެހީން ސަލާންޖަހަން ނުޖެހޭ ނިޒާމެއް ބިނާ ކުރުމާއި، އެއްވެސް ރައްޔިތެއްގެ ކަމެއްގައި ފަސް ނުޖެހުމާއި، ދިވެހީންނަށް ޖަވާބުދާރީވާނެ މަޖިލީހެއް އުފެއްދުމަށެވެ. 

މި އިންތިހާބުގައި ޖުމްލަ 4 ކެނޑިޑޭޓެއް ވާދަކުރައްވާއިރު، އިންތިހާބުގެ ޕްލެޖް ދައްކާގޮތުން ޙުސްނީ އުޅުއްވަނީ މާ ކުރީގައެވެ. މާފަރު ރައްޔިތުން އެންމެ ބޮޑަށް އެދެމުން ދިޔަ އެ ރަށުގެ އިޙްތިޞާ އަނބުރާ އިޢާދަކށްދެއްވުމާއި، މާފަރުގެ ހިއްކި ބިމަށް އިތުރުކޮށްދިން 5 ހެކްޓަރުގެ ބިމާއެކު ރަށޫގެ ރައްޔިތުން ނިންމާފައިވަނީ މި ފަހަރު ޙުސްނީ ނޫން ބޭފުޅަކު ދާއިރާގެ މަޖިލިސް ގޮނޑިއަށް އިންތިހާބު ނުކުރުމަށެވެ. ހަމައެގޮތަށް ލަންދޫ މަނަދޫއަށްވެސް ޑރ މުޙައްމަދު މުޢިއްޒު ވެވަޑައިގެންފައިވާ ވަޢުދުތައް ފުއްދުމުގައި ސާބިތުކަމާއެކު ހުންނަވާނެ ކަމަށް ޙުސްނީ ވަނީ ވަޢުދުވެލައްވާފައެވެ.