ސަރުކާރުގެ މައި ހޮސްޕިޓަލް، އައިޖީއެމްއެޗްގެ މެޑިކަލް ޑިރެކްޓަރަކަށް ޑރ. އައިމިނަތު ޒޭބާ އަހުމަދު ހަމަޖައްސައިފިއެވެ.

އިމަޖެންސީ މެޑިސިންގެ ހާއްސަ ޑޮކްޓަރު ޒޭބާ އެ މަގާމަށް ހަމަޖެއްސީ މިއަދެވެ.

އައިޖީއެމްއެޗްއިން ވިދާޅުވީ، ޑރ. ޒެއިބާ އެ މަގާމަށް ހަމަޖައްސާފައިވަނީ ތިން އަހަރުގެ މުއްދަތަކަށް ކަމަށެވެ. މިއަދުން ފެށިގެން މެޑިކަލް ޑިރެެކްޓަރުގެ ޒިންމާ ޑރ. ޒޭބާ އަދާކުރައްވަމުން ގެންދަވާނެ ކަމަށް އެ ހޮސްޕިޓަލުން މައުލޫމާތު ދެއްވައެވެ.

އެގޮތުން ކްލިނިކަލް އޮޕަރޭޝަންތައް ބެލެހެއްޓުމާއި ބަލި މީހުންނާއި މުވައްޒަފުންނަށް ހޮސްޕިޓަލުގައި އުފާވެރި މާހައުލެއް ގާއިމްކޮށްދިނުމަށް ޑރ. ޒޭބާ މަސައްކަތް ކުރައްވާނެ ކަމަށް ވިދާޅުވެފައި ވެއެވެ.

މީގެ ކުރިން އައިޖީއެމްއެޗްގެ މެޑިކަލް ޑިރެކްޓަރަކަށް ހުންނެވީ ރޭޑިއޮލޮޖިސްޓް ޑރ. އާމިނަތު ނަޒީރެވެ. ޑރ. ޒޭބާ އެ މަގާމަށް އައްޔަން ކުރެއްވީ ޑރ. އާމިނަތު ނަޒީރުގެ ދައުރުހަމަވުމުން އެ މަގާމަށް ބޭފުޅަކު އައްޔަން ކުރުމަށް ހުޅުވާލި ފުރުސަތުގައި އެންމެ މަތިން މާކްސް ލިބިވަޑައިގެންނެވެ.

މެޑިކަލް ޑިރެކްޓަރުގެ އަސާސީ މުސާރައަކީ 41،344 ރުފިޔާއެވެ. އެ މަގާމުގައި ހުންނަވާ ބޭފުޅަކަށް 30،783 ރުފިޔާގެ އެލަވަންސެއްވެސް ލިބޭނެއެވެ. އެހެންކަމުން މެޑިކަލް ޑިރެކްޓަރަކަށް މަހަކު 72،125 ރުފިޔާ ލިބޭނެއެވެ.