މަގުތަކާއި އާއްމު ތަންތަން ދިއްލަން ޑޮމެސްޓިކް ރޭޓުން ބިލު ކުރަން ނިންމަވައިފި

ރައީސް ޑރ. މުހައްމަދު މުއިއްޒު --

ސިޓީތަކާއި ރަށްރަށުގެ މަގުތަކާއި އާއްމު ތަންތަން ދިއްލުމަށް ކައުންސިލް ތަކަށް ޑޮމެސްޓިކް ރޭޓުން ބިލު ކުރާ ގޮތަށް ރައީސް ޑރ. މުހައްމަދު މުއިއްޒު ނިންމައިވައިފި އެވެ.

ރައީސް ކުރެއްވި އެކްސް ޕޯސްޓެއްގައި ވިދާޅުވީ ރާއްޖޭގެ ހުރިހާ ސިޓިތަކާއި ރަށްރަށުގެ މަގުތަކާއި އާއްމު ތަންތަން ދިއްލުމަށް ކައުންސިލް ތަކަށް ޑޮމެސްޓިކް ރޭޓުން، ފެނަކަ ނޫނީ ސްޓެލްކޯ އިން ބިލު ކުރަން ނިންމަވާފައިވާ ކަމަށެވެ.

އެމަނިކުފާނު ވިދާޅުވީ މި ނިންމެވުމާ އެއްގޮތަށް އަމަލުކުރަން ފަށާނީ އަންނަ އަހަރުގެ ޖެނުއަރީ އެކަކުން ފެށިގެން ކަމަށެވެ.

މި ބަދަލަކީ ލާމަރުކަޒީ ނިޒާމު އިތުރަށް ތަރައްގީ ކުރުމަށް ކުރެވޭ ކަންކަމުގެ ތެރޭގައި ހިމެނޭ ކަމެކެވެ.

ރައީސް ޑރ. މުއިއްޒު ވިދާޅުވީ މި ގެންނެވި ބަދަލުގެ ނަތީޖާއަކަށް ވާނީ މުނިސިޕަލް އެހެން ހިދުމަތްތަކަށް ހަރަދު ކުރަން ލިބޭ އަދަދު ބޮޑުވެގެންދިޔުން ކަމަށެވެ.

މި މަހުގެ ފަސް ވަނަ ދުވަހު ރައީސް ޑރ. މުއިއްޒު ވަނީ އަންނަ އަހަރުން ފެށިގެން ކައުންސިލްގެ ބަޖެޓުން، އަންހެނުންގެ ތަރައްގީއަށް މަސައްކަތްކުރާ ކޮމެޓީ ތަކަށް ދެމުން އަންނަ ބަޖެޓު ދެގުނަ ބޮޑު ކުރައްވައި، ކައުންސިލް ތަކަށް ބްލޮކް ގްރާންޓުން އެހީދޭ އުސޫލު މުރާޖައާ ކުރެއްވުމަށް ނިންމަވާފަ އެވެ.

ރައީސް ޑރ މުޢިއްޒު