މޭޔަރުކަމުގައި ކުރިމަތިލާން ޖެހުނު ފަދަ ފިއްތުމެއް، ކައުންސިލްތަކަށް ކުރިމަތިވިޔަ ނުދޭނަން: ރައީސް

އަޒުމު ކަނޑައަޅުއްވައިގެން ހުންނެވީ، މާލޭ ސިޓީގެ މޭޔަރުކަމުގައި ހުންނެވި އިރު ކުރިމަތިލައްވަން ޖެހިވަޑައިގެންނެވި ފަދަ ހުރަސްތަކާއި އުނދަގޫތައް، މި ސަރުކާރުގައި ކައުންސިލްތަކަށް ކުރިމަތިވިޔަނުދެއްވުން ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، ހދ. ކުޅުދުއްފުށި ސިޓީގެ ރައްޔިތުންނާ ބައްދަލު ކުރައްވައި ވާހަކަފުޅުދައްކަވަމުންނެވެ.

ލާމަރުކަޒީ ގާނޫނަށް ގެނައި 16 ވަނަ އިސްލާހާ ގުޅިގެން ބައެއް ފަރާތްތަކުން ސަރުކާރަށް އަމާޒު ކުރާ ފާޑުކިޔުމަށް އިޝާރާތް ކުރައްވަމުން ރައީސް ވަނީ، އެ މަނިކުފާނު އެދިވަޑައިގަންނަވަނީ ލާމަރުކަޒީ ނިޒާމު ޗެމްޕިއަން ކުރުމަށް ކަމަށް ވިދާޅުވާ ވިދާޅުވުން ތަކުރާރު ކުރައްވާފަ އެވެ.

މޭޔަރު ކަމުގައި ހުންނެވި އިރު، އޭރުގެ ސަރުކާރުން ސިޓީ ކައުންސިލަށް ކުރިމަތިކުރި ފިއްތުން ތަކަށް އިޝާރާތް ކުރައްވަމުން އެ މަނިކުފާނު ވިދާޅުވީ، މި ސަރުކާރުން ކައުންސިލް ތަކަށް އެ ފަދަ ފިއްތުންތައް ކުރިމަތިވިޔަ ނުދޭނެ ކަމަށެވެ.

ކައުންސިލްތައް ބާރުވެރި ކުރުމަށް ގާނޫނީ ގޮތުންނާއި އެ ނޫން ގޮތް ގޮތުން ވެސް ފިޔަވަޅުތައް އަޅަމުން އަންނަނީ އެ މަގުސަދުގައި ކަމަށް އެ މަނިކުފާނު ވިދާޅުވި އެވެ.

އެ ގޮތުން އަންހެނުން ކުރިއަރުވާ ކޮމިޓީތަކުގެ އިނާޔަތަށް ގެނައި ބަދަލާއި ކައުންސިލްތަކުގެ އާ އިމާރާތްތަކުގެ މަޝްރޫއުތަކާއި، ކައުންސިލްތަކުން މުސްތަގިއްލު ކަމާއެކު އިގުތިސާދީ މަންފާ ހޯދުމަށް މަގުފަހި ކުރުމަށް ޓަކައި، ރަށްރަށާއި ފަޅުތައް ރަށްރަށުގެ އިހުތިސާސްގައި ހިމެނުމާއި ރަށްރަށުގެ ބައިތަކުގެ ގޮތުގައި ހަމަޖެއްސުން ފަދަ ފިޔަވަޅުތަކުން އެ މަނިކުފާނު މިސާލު ދެއްކެވި އެވެ.

މީގެ އިތުރުން، ރައްޔިތުންގެ ހިޔާލާއެކު ހުށަހަޅައި ތަރައްގީގެ ޕްލޭނާއި ފާސްކޮށްފައިވާ ލޭންޑް ޔޫސް ޕްލޭނާ އެއްގޮތަށް ހުށަހަޅައި ކަން ކަމަށް ސަރުކާރުން މަގުފަހިކޮށްދޭނޭ ކަމަށް ވެސް އެމަނިކުފާނު ވިދާޅުވި އެވެ.

ރައީސްގެ ވާހަކަފުޅު ނިންމަވާލައްވާފައިވަނީ، ތަފާތު ކުރުމެއް ނެތި ވައުދުތައް ފުއްދުމުގެ އަޒުމުގައި ހުންނެވިކަން ތަކުރާރު ކުރައްވައި، ތައައްސަބެއް ނެތި ވިސްނައިފި މީހަކަށް، ލާމަރުކަޒީ ބާރުވެރި ކަމަށް އެމަނިކުފާނު ކުރައްވާ މަސައްކަތްޕުޅުތައް ސާފު ވާނޭ ކަމަށް ވިދާޅުވަމުންނެވެ.