އއ. ތޮއްޑޫގައި މިހާރު މަސައްކަތް ކުރިއަށްދާ 30 އެނދުގެ ސިއްހީ މަރުކަޒު، ހޮސްޕިޓަލެއްގެ ގޮތުގައި ތަރައްގީ ކުރަން ނިންމަވާފައިވާ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.
އެމަނިކުފާނުގެ މި ނިންމެވުން ހާމަ ކުރެއްވީ މިއަދު ތޮއްޑޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.
ރައީސް ވިދާޅުވީ ތޮއްޑޫ ސިއްހީ މަރުކަޒު، ހޮސްޕިޓަލަކަށް ބަދަލު ކުރުމަށް ބޭނުންވާ އޮޕަރޭޝަން ތިއޭޓަރާއި އައިސީޔޫ ހިމެނުމުގެ ފުރުސަތު އެބައޮތް ކަމަށް ހެލްތް މިނިސްޓްރީގައި ތިއްބެވި ކަމުގެ ފަންނީ ބޭފުޅުން ޔަގީންކަން ދެއްވާފައިވާ ކަމަށެވެ.
ގައު އަތުރައިގެން ތޮއްޑޫ މަގު ހެދުމުގެ މަޝްރޫއުގެ އަމަލީ މަސައްކަތް ފެށުމުގެ ހުރިހާ ކަމެއް ތައްޔާރުވެފައިވާކަން ފާހަގަ ކުރައްވައި އެމަނިކުފާނު ވިދާޅުވީ އެ މަސައްކަތް ވެސް ވަރަށް އަވަހަށް ނިންމަވައި ދެއްވާނެ ކަމަށެވެ. އަދި ފުޓުބޯޅަ ދަނޑުގައި ލައިޓް ޖެހުމުގެ މަސައްކަތާއި ފިޓްނަސް އެންޑް ރިކްރިއޭޝަން ސެންޓަރާއި އައުޓްޑޯ ޖިމްގެ މަސައްކަތްވެސް މި އަހަރަށް ތާވަލު ކުރެވިފައިވާ ކަމަށް އެ މަނިކުފާނު ވިދާޅުވި އެވެ.
ތޮއްޑޫއަކީ ދަޑުވެރިކަމަށް ހާއްސަ ރަށެއްކަން ފާހަގަ ކުރައްވައި ރައީސް ވިދާޅުވީ، އެރަށުގައި ގާއިމު ކުރުމަށް ނިންމާފައިވާ، ދިވެހިރާއްޖޭގެ ގައުމީ ޔުނިވާސިޓީގެ، ފެކަލްޓީ އޮފް އެގްރިކަލްޗާ އެންޑް ފުޑް ސައިންސް، އުފައްދަވައި އެ ފެކަލްޓީ ގެ އިމާރާތް ގާއިމު ކުރުމުގެ މަޝްރޫއު ވެސް ވަރަށް އަވަހަށް ފެށޭނެ ކަމަށެވެ.
ތޮއްޑޫއަކީ ދަނޑުވެރިކަމާއި ޓޫރިޒަމްގެ ދާއިރާއިން ކުރިއަރާފައިވާ ރަށެއްކަން ފާހަގަ ކުރައްވައި، ރަށުގެ އިގގުތިސާދީ ތަރައްގީއަށް ސަރުކާރުން އިތުރަށް ކަންކަން ފަހިކޮށްދެއްވުމުގެ ގޮތުން، ތޮއްޑޫއަށް ހާއްސަ ސީ ޕްލޭން ޕްލެޓްފޯމެއް ގާއިމުކޮށްދެއްވައި އަންނަ އަހަރުގެ ފެބުރުވަރީ މަހުން ފެށިގެން ޝެޑިއުލް ސީޕްލޭން ދަތުރުތައް ތޮއްޑޫއަށް ފަށާނެކަން ރައީސް މިއަދު އިއުލާން ކުރެއްވި އެވެ.
ކޮމެންޓް