ކުރީގެ ރައީސް އަބްދުﷲ ޔާމީންގެ ސަރުކާރުގައި ލިބުނު ހުރިހާ ފައިސާއެއް "ބައްކޮށް" ފޮރުވި ނަމަވެސް ރައީސް ޑރ. މުހައްމަދު މުއިއްޒަކީ ތަފާތު ދައްކަވާނެ ބޭފުޅެއް ކަމުގައި ރައްޔިތުންގެ މަޖިލިހުގެ ދިއްދޫ ދާއިރާގެ މެންބަރު އަބްދުއްލަތީފް މުހައްމަދު ރޭ ވިދާޅުވެއްޖެއެވެ.

ޕީއެންސީ ހަރުގޭގައި ބޭއްވި ޖަލްސާގައި ވާހަކަ ދައްކަވަމުން ލަތީފް ވިދާޅުވީ ރައީސް ޔާމީންގެ ސަރުކާރުގައި އުޖާލާ ދުވަސްތަކެއް ރައްޔިތުންނަށް ފެނިގެން ދިޔަ ނަމަވެސް އެމަނިކުފާނުގެ ސަރުކާރުގައި ލިބުނު ފައިސާ ރައްޔިތުނަށް ދިނުމުގެ ބަދަލުގައި އަމިއްލަފުޅު ތިޖޫރީގައި ބަންދުކޮށްފައި ބެހެއްޓީ ކަމަށެވެ. ނަމަވެސް ރައީސް މުއިއްޒުގެ ސަރުކާރުގައި ހުރިހާ މަންފާއެއް ލިބެމުންދަނީ ރައްޔިތުންނަށް ކަމަށް އޭނާ ވަނީ ވިދާޅުވެފައެވެ.

"ރައީސް ޔާމީން މަސައްކަތް ކުރެއްވީ އެއާ އިދިކޮޅަށް. އެއިން އެއްވެސް ކަމެއް ކުރިޔަ ނުދިނުމަށް. އެކަމަކުވެސް ރައީސް ޑރ.މުއިއްޒު މަސައްކަތްކުރެއްވީ މުޅިން ތަފާތުކޮށް. ޚަރަދުކޮށްގެން ރައްޔިތުންނަށް އުފާފާގަތިކަން ގެނެސްދެއްވީ، ގެންގޮސް ތިޖޫރީއަކަށް ލާފައި ފޮރުވީކީއެއް ނޫން. ލިބުނު އެއްޗެއްވިއްޔާ ބަކްކޮށްގެން އުޅުނީ. " ލަތީފް ވިދާޅުވިއެވެ.

ލަތީފް ވިދާޅުވީ މި ސަރުކާރަކީ ވިސްނުންތެރިކަމާއި ނަޒާހަތްތެރިކަމާއެކީ މަސައްކަތް ކުރައްވަމުންދާ ސަރުކާރެއް ކަމަށާއި ރައްޔިތުން ތިބީ ފިނި ހިޔަލުގައި ހިތްހަމަޖެހިފައި ކަމަށެވެ.

މީގެއިތުރުން ރައްޔިތުންނަށް ހައްގުތައް ހޯދައި ދިނީ އެމީހުން ކަމަށް އެމްޑީޕީން ދައުވާކުރި ނަމަވެސް ރައްޔިތުން ބޭނުންވީ އެމްޑީޕީގެ އަނިޔާވެރި ކަމުން ސަލާމަތްވެ ފިނިހިޔަލަށް ދިޔުމަށް ކަމަށް ލަތީފް ވިދާޅުވިއެވެ. ނިމިދިޔަ ސަރުކާރުތަކަށް ބަލާއިރު ރައްޔިތުންނަށް ކުޑަވެސް މަންފާއެއް ލިބުނީ ޕީޕީއެމް ސަރުކާރުގައިކަން ފާހަގަކުރައްވަމުން ލަތީފް ވިދާޅުވީ އެވެރިކަން ނިމިދިޔައީ ވެރިމީހާގެ ސަބަބުން ނޫން ކަމަށެވެ. އެ ވެރިކަން ނިމިދިޔައީ "ބަދިގެތެރެއިން" ރައްޔިތުންގެ ކަންތައް ނިންމަން ފެށި ހިސާބުން ކަމަށާއި މި ވެރިކަމުގައި ރައްޔިތުންނާއި ގުޅުންހުރި ހުރިހާ ކަމެއް ނިންމާނީ ގައުމުގެ ވެރިމީހާ ކަމަށް ވަނީ ވިދާޅުވެފައެވެ.

ހަމައެއާއެކު ރައީސް މުއިއްޒު ރައްޔިތުންނަށް އުފާފާގަތިކަން ގެނެސްދީ ތަނަވަސްކަން ގެނެސްދެއްވައިފި ކަމަށާއި ރައްޔިތުންގެ މޫނުމަތިން މިހާރު ފެނިގެންދަނީ ހިތްހަމަޖެހިގެން ހިނިތުންވެފައި ތިބި މަންޒަރު ކަމަށް ލަތީފް ވިދާޅުވިއެވެ.