ސިޔާސީ ގޮތުން ބައިކިލޯ ހަމަނުވާ ދެތިން މީހުން ނެރެގެން ބެހެން ނޫޅުމަށް ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

ކުރީގެ ރައީސް އަބްދުﷲ ޔާމީނާއި އެމަނިކުފާނުގެ އަރިހުގައި އުޅުއްވާ ފަރާތްތަކަށް ފާޑުވިދާޅުވެ އަބްދުއްރަހީމް ބަހުގެ ހަމަލާތައް އަމާޒުކޮށްފައިވަނީ ޕީއެންސީގެ ޖަގަހަ ހުޅުވުމަށް ރޭ ކުރިއަށް ގެންދިޔަ ރަސްމިއްޔާތުގައެވެ.

އެގޮތުން އެ ޖަލްސާގައި ވާހަކަދައްކަވަމުން އަބްދުއްރަހީމް ވިދާޅުވީ ސިޔާސީ ކަންކަމުގައި ކާމިޔާބީ ލިބޭނީ ރައްޔިތުންނާ ގުޅުން އުފައްދަން ކެރޭ މީހުންނަށް ކަމަށާއި ރައްޔިތުންގެ އިހުސާސްތަކުގެ އަޑު އަހަން ކެރޭ މީހުންނަށް ކަމަށެވެ.

މަވެތިކަމަކަށް މިއަދަކު ރައްޔިތުންގެ ތާއީދެއް ނެތް ކަމަށް ވިދާޅުވެ އަބްދުއްރަހީމް ވަނީ ކުރީގެ ރައީސް ޔާމީނަށް ވަރަށް ބޮޑަށް ފާޑުވިދާޅުވެފައެވެ.

"އަޅުގަނޑު މި ދަންނަވަނީ ފިިނި ކޮޓަރީގައި ތިއްބަވައިގެން ބައިކިލޯ ހަމަނުވާ ދެތިން މީހުން ނެރެގެން އަޅުގަނޑުމެންނާ ބެހެން ނުހައްދަވާށޭ." އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ސިޔާސީ ގޮތުން ބައިކިލޯ ހަމަނުވާ މީހުން ގޮވައިގެން މަގުމައްޗަށް ނިކުމެ ރައްޔިތުންގެ ނުހަނު ބޮޑު ތާއީދު އޮތް ސަރުކާރަކާ ދިމާކުރަނީ ލަދުހަޔާތް ނެތުމުން ކަމަށެވެ.

ރައީސް ޔާމީންގެ އަރިހުގައި ގެންގުޅުއްވާ ކުރީގެ ނައިބުރައިސް މުހައްމަދު ޖަމީލް އަހުމަދު އަދި ކުރީގެ މިނިސްޓަރު މުހައްމަދު މަލީހަކީ ރައްޔިތުން ބަލައިގަންނަ ބައެއް ނޫން ކަމަށް އަބްދުއްރަހީމް ވިދާޅުވިއެވެ. އަދި އެ ބޭފުޅުން ގޮވައިގެން އުޅެގެން ލިބޭނެ ކުރިއެރުމެއް ނެތްކަމަށް ވިދާޅުވިއެވެ.