ފުލުހެއްގެ ގައިގައި ޖެއްސުމަށްފަހު ފިލި ކާރުގައި އިން އިތުރު މީހަކު ހައްޔަރުކޮށްފި

ހުޅުމާލޭގައި ހިންގި މާރާމާރީއަކާ ގުޅިގެން ސީނަށް ދިޔަ ފުލުހެއްގެ ގައިގައި ކާރަކުން ޖެއްސުމަށް ފަހު ފިލި މައްސަލައިގައި ހޯދަމުންދިޔަ މީހާ ހައްޔަރުކޮށް ބަންދަށް 10 ދުވަސް ޖަހައިފިއެވެ.

ފުލުހުން ވިދާޅުވީ ހޮނިހިރު ދުވަހުގެރޭ ފަތިހު، ހުޅުމާލޭ ފިލިގަސް މަގުގައި މާރާމާރީއެއް ހިންގާކަމަށް ފުލުހުންނަށް ރިޕޯޓް ކުރުމުން އެ ސަރަހައްދަށް ފުލުހުން ދިޔަ ކަމަށެވެ.

ފުލުހުން ދިއުމުން، މާރާމާރީ ހިންގި މީހާ އެ ހިސާބުގައި އޮތް ކާރަކަށް އަރައި ފިލަން އުޅުނު ތަން ފުލުހަކަށް ފެނިގެން އެ ކާރު ހުއްޓުވަން މަސައްކަތް ކުރަން އުޅުމުން ފުލުސް މީހާގެ ގައިގައި ކާރަކުން ޖައްސާ ކާރުގައި ތިބި މީހުން ފިލާފާއިވާ ކަމަށް ފުލުހުން ވިދާޅުވިއެވެ.

ނަމަވެސް މި ދެ މީހުން ހޯދައި މިހާރު ވަނީ ހައްޔަރުކޮށްފައެވެ. މީގެ ތެރެއިން އެކެއްގެ ބަންދަށް މީގެ ކުރިން ވަނީ 15 ދުވަސް ޖަހާފައެވެ. ދެވަނަ މީހާ ހޯދައި ހައްޔަރުކޮށްފައިވަނީ އިއްޔެގެ ވަގުތެއްގައެވެ.

ފުލުހުންގެ ތަރުޖަމާނު އަހުމަދު ޝިފާން "ވަގުތު" އަށް ވިދާޅުވީ އެ މީހާގެ ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރު ކުރުމުން އޭނާގެ ބަންދަށް 10 ދުވަސް ޖަހާފައިވާ ކަމަށެވެ.

އެ މާރާމާރީގައި އަނިޔާވި ފުލުސް މީހާއަށް ހުޅުމާލެ ހޮސްޕިޓަލުން ފަރުވާ ދިނުމަށްފަހު ވަނީ ދޫކޮށްލައިފައެވެ.

---