އިސްލާމްދީނަށް ފުރައްސާރަކޮށް އެކްސްގައި ކޮށްފައިވާ ޕޯސްޓެއްގެ މައްސަލަ ފުލުހުން ބަލަން ފަށައިފިއެވެ.

"އައިޝަތު ނަޒްހާ" ކިޔާ އެކައުންޓަކުން އެކްސްގައި ވަނީ އިސްލާމް ދީނަށް ފުރައްސާރަކޮށް ގިނަ އަދަދެއްގެ ޕޯސްޓަކެއް ކޮށްފައެވެ. ފޭކު އެކައުންޓެއް ކަމަށް ބެލެވޭ އެ އެކައުންޓުން ކުރި ޓްވީޓުގައި ވަނީ ތަވާފް ކުރުމަށް ނިސްބަތްކޮށް، ދީނަށް ހަޖޫ ޖަހައި، އެކަން ކުރިޔަސް ޔޯގާ ހަރާމް ކަމަށް ބުނެފައެވެ.

އެ ޕޯސްޓާއި ގުޅިގެން ފުލުހުން ވިދާޅުވީ އިސްލާމް ދީނަށް ފުރައްސާރަކޮށް އެކްސްގައި އާންމު ކޮށްފައިވާ ޕޯސްޓް ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި އެ ޕޯސްޓާއި ގުޅިގެން ބަލަން ޖެހޭ ކަންކަން ފުލުހުން ބަލަމުންދާ ކަމަށެވެ.

އެ މައްސަލަ ފުލުހުން ބަލަމުންދާއިރު ނަޒްހާ ނަމަކަށް ކިޔާ އެ އެކައުންޓުން ދީނަށް ފުރައްސާރަކޮށް އެކި ކަހަލަ ޕޯސްޓްތައް ވަރަށް ގިނައިން ކޮށްފައި ހުރެއެވެ.

ހަށިގަނޑު ދުޅަހެޔޮ ކުރުމަށް ކަސްރަތެއްގެ ގޮތުގައި ބައެއް ދިވެހީން ޔޯގާގެ ހަރަކާތްތައް ކުރާ ނަމަވެސް އެކަން ނުކުރުމަށް ދީނީ އިލްމުވެރިން ބާރުއަޅުއްވައެވެ.

ނިމިދިޔަ ބުރާސްފަތި ދުވަހަކީ ބައިނަލްއަގުވާމީ ޔޯގާ ދުވަސް ކަމަށްވިއިރު އިންޑިއާ އެމްބަސީގައި ދިވެހީން ބައިވެރިކޮށްގެން ޔޯގާގެ ކަސްރަތު ހަރަކާތްތަކެއް ކުރިއަށް ގެންގޮސްފައިވާތީ ބައެއް ފަރާތްތަކުން ވަނީ އެކަން ކުށްވެރިކޮށްފައެވެ.