ވީއައިއޭގެ އައު ޓާމިނަލް ހުޅުވުގެ ކައުންޓްޑައުން ފަށައިފި

ރާއްޖޭގެ ފަތުރުވެރިކަމާއި ވައިގެ ސިނާއަތުގެ އެންމެ ބޮޑު މަޝްރުއު، ވެލާނާ އިންޓާނޭޝަނަލް އެއާޕޯޓު (ވީއައިއޭ) ގެ އައު ޕަސިންޖާ ޓާމިނަލް ހުޅުވުމުގެ ކައުންޓްޑައުން ރަސްމީކޮށް ފަށައިފި އެވެ.

ޓާމިނަލް ހުޅުވުމުގެ ކައުންޓްޑައުން ރޭ ދަންވަރު 12:00 ގައި ރަސްމީކޮށް ފައްޓަވައިދެއްވެވީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުޙައްމަދެވެ. މިރަސްމިއްޔާތުގައި ކުންފުނީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ލަމްއާން އަދި މުޖުތަބާ ލަތީފް އާއި ކުންފުނީގެ ސީނިއާ މެނޭޖުމެންޓުގެ ބޭފުޅުން ބައިވެރިވެ ވަޑައިގެންނެވިއެވެ.

މި ކައުންޓްޑައުން ފައްޓަވައިދެއްވުމަށްފަހު، އެމްއޭސީއެލްގެ އެމްޑީ ޝަރީފް، ވަނީ 1960 ވަނަ އަހަރު ދަގަނޑު ފިލާތަކެއް ބޭނުން ކޮށްގެން ހެދި ރަންވޭގެ މައްޗަށް އެންމެ ފުރަތަމަ ބޯޓެއް ޖެއްސުމަށް ދިވެހިން ކުރި ގައުމީ މަސައްކަތް ހަނދާން އައު ކުރައްވާފަ އެވެ.

އެގޮތުން ވިދާޅުވީ، އެމްއޭސީއެލްގައި މިވީ މަދު ދުވަސްކޮޅުގެ ތެރޭގައި ކުންފުނީގެ މުވައްޒަފުންގެ ހިތްވަރާއި ކެރުމާއި، އަދި ކަމަކަށް ކުރިމަތި ލައިފި ނަމަ އެކަމެއް ނިންމުމާއި މެދު އޮންނަ ޔަގީންކަމާއިމެދު އެއް ވެސް ޝައްކެއް ނުކުރައްވާ ކަމަށެވެ.

އަދި ހުރިހާ މުވައްޒަފުން ވެސް ފުރިހަމަ އަށް އެއްބާރުލުން ދީގެން، ރާއްޖެއަށް މިކޮށްދޭ ގައުމީ މަސައްކަތް ކާމިޔާބު ކުރާނެ ކަމުގެ ފުރިހަމަ ޔަގީންކަން އޮތްކަމަށް ވެސް ޝަރީފް ވިދާޅުވި އެވެ. 

ވީއައިއޭ ހިންގާ ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ ރައީސް ޑރ. މުޙައްމަދު މުއިއްޒުގެ އެންމެ މުހިއްމު އެއް ވައުދުފުޅު ކަމުގައިވާ ވީއައިއޭގެ އައު ޓާމިނަލް ހުޅުވުމަށް ވާންޖެހޭ ފަހުގެ ތައްޔާރީތައް މިހާރު ވަމުން އަންނަ ކަމަށެވެ.

އެ ކުންފުނިން ބުނީ ރާއްޖޭގެ ވައިގެ ދަތުރުފަތުރު ކުރުމުގެ ސިނާއަތަށް އިންގިލާބީ ބަދަލުތަކެއް ގެންނާނެ މި ޓާމިނަލަކީ ޒަމާނީ ފެންވަރަށް ވެލާނާ އިންޓަނޭޝަނަލް އެއާޕޯޓް ތަރައްގީ ކުރުމަށް ކުރިއަށްގެންދާ މަޝްރުއޫތަކުގައި ހިމެނޭ އެންމެ ބިޔަ އަދި އެންމެ މުހިންމު އެއް މަޝްރު ކަމަށެވެ.

ފަހުގެ ޓެކްނޮލޮޖީގެ ވަސީލަތްތަކާއި އެކު މިޓާމިނަލް ހުޅުވިގެންދިޔުމަކީ ރާއްޖޭގެ މުޅި އިގުތިސާދަށް ހާއްސަކޮށް ފަތުރުވެރިކަމާއި ދަތުރުފަތުރުގެ ދާއިރާއަށް ބޮޑެތި ކުރިއެރުންތަކެއް ގެނުވާނެ ކަމެކެވެ.

އައު ޓާމިނަލް ހުޅުވުމަށްވާންޖެހޭ ފަހުގެ ތައްޔާރީތައް މިހާރު ވަމުން އަންނައިރު، މިއީ މިހާރު ބޭނުންކުރާ ޓަރމިނަލަށްވުރެ އެތައްގުނައެއް ބޮޑު، އަހަރެއްގެ މައްޗަށް 7.5 މިލިއަން ދަތުވެރިންނަށް ހިދުމަތްދެވޭނެ ތަނަވަސް ޓަމިނަލެކެވެ.

އެއިރޯ ބްރިޖްއާއި، ސެލްފް ޗެކިން ސިސްޓަމްއާއި، އޮޓޯމެޓިކް ބެގޭޖް ހެންޑަލިންގް ސިސްޓަމްގެ އިތުރުން އެޑްވާންސް ވިޝުއަލް ޑޮކިން ގައިޑެންސް ސިސްޓަމްތަކުގެ ހިދުމަތް ޓާމިނަލުން ލިބިގެންދާނެ އެވެ.