ހަތަރު އަހަރުގެ މެދުކެނޑުމަކަށްފަހު މިއަނެއްކާވެސް މިއަހަރު ބޭއްވުމަށް އިޢުލާންކޮށްފައިވާ މައިކަޕް އަކީ ރާއްޖޭގެ އެންމެ އުތުރު ދެ އަތޮޅަށް ހުޅުވާލައިގެން ބާއްވާ އެންމެ އަގުބޮޑު އަދި އެންމެ ފޯރި ގަދަ ފުޓުބޯޅަ މުބާރާތް ކަމަށާއި، މިއީ ފެށުމެއް ކަމަށް މި އަހަރު މައިކަޕްގެ ޓައިޓަލް ސޮޕޮންސަރ ބިއުޓިފުލް ބުލޫގެ އޯނަރ ވިދާޅުވެއްޖެއެވެ.

ބިއުޓިފުލް ބުލޫގެ އޯނަރ މުޙައްމަދު ޔާމީން ވިދާޅުވީ، މައިކަޕްގެ ޓައިޓަލް ގަތުމަށް ނިންމީ ވަރަށް ބޮޑަށް ވިސްނާފައި ކަމަށާއި، އެގޮތުން މިއީ ޒުވާނުން އެންމެ އިންތިޒާމު ކުރާ ފުޓުބޯޅަ މުބާރާތް ކަމަށެވެ.

އިހަވަންދޫ އަކީ ފުޓުބޯޅައިގައި ވަރަށް ފޯރިގަދަ ރަށެއްކަން ފާހަގަކޮށް ޔާމީން ވިދާޅުވީ މި މުބާރާތުގެ ސަބަބުން އިހަވަންދޫގެ ވިިޔަފާރިތަކަށްވެސް އެތައް ފައިދާއެއް ލިބެމުން ދާ ކަމަށާއި، ވޭތުވެދިޔަ 14 އަހަރުވެސް އެކަން ވަރަށް ބޮޑަށް ފާހަގަ ކުރެވިފައިވާ ކަމަށެވެ.

މައިކަޕްގެ 14 ވަނަ މުބަރާތް މިރޭ ރަސްމީިކޮށް އިއުލާންކޮށްފައިވާއިރު މިއީ ހއ،ހދ މި ދެ އަތޮޅަށް ހުޅުވާލައިިގެން ބާއްވާ އެންމެ ދުވަސްވީ އަދިި އެންމެ އަގުބޮޑު މުބާރާތެވެ. 4 އަހަރުގެ މެދު ކެނޑުމަކަށްފަހު މި މުބާރާތް މިއަހަރު އަލުން ބާއްވާއިރު މުބާރާތުގެ ޗެމްޕިއަން ޓީމަަށް 100،000 ރުފިޔާގެ ފައިސާގެ އިނާމެއް ދިިނުމަށް ވަނީ ނިންމާފައެވެ. އަދި ރަނަރަޕް ޓީމަަށް 35،000 ރުފިޔާ ދިނުމަށް ވަނީ ނިންމާފައެވެ.

މި މުބާރާތް ހާއްޞަކޮށްފައިވަނީ ހއ އަދި ހދ މި ދެ އަތޮޅުގެ ހުރިހާ ކުލަބު ޖަމްޢިއްޔާތަކަށާއި، މުއައްސަސާތަކަށާއި ކުންފުނި ތަކަށެވެ. މީގެ އިތުރުން އިހަވަންދޫއަށް ނިޞްބަތްވާ ކޮންމެ ޓީމަކަށްވެސް މި މުބަރާތުގައިި ބައިވެރިވެވޭނެއެވެ.

މިއީ ޒުވާނުންްގެ އެންމެ މަޤުބޫލު ފުޓުބޯޅަ މުބާރާތް. އެންމެ ގިނަ ބަޔަކު އިންތިޒާރު ކުރަމުން އަންނަ މުބާރާތް. މިއަހަރުގެ އިންތިޒާމުތައް ބޮޑުތަނުން ރަނގަޅުވާނެ - ޕޯލްސްޓާރގެ ރައީސް ޝުޖާޢު ވިދާޅުވިއެވެ.

މުބާރާތުގަައި ބައިވެރިވާ ކޮންމެ ޓީމަކަށް ޓައިޓަލް ސްޕޮންސާރގެ ފަރާތުން 2000 ރުފިޔާގެ ފައިސާގެ އެހީއެއްވެސް ދިނުމަށް ވަނީ ހަމަޖެހިފައެވެ.

މައިކަޕް މުބާރާތަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު ޢަބްދުالله (މުޙައްމާ) ގެ އިސްނެގުމަކަށް ބާއްވަމުން އަންނަ މުބާރާތެކެވެ.