އާރުޓީއެލްގެ ނަމުގައި ސްކޭމެއް ހިންގާތީ، ސަމާލުވާން އެދިއްޖެ

"މޯލްޑިވްސް ޕަބްލިކް ޓްރާންސްޕޯޓް" ނަމުގައި ހިންގާ ފޭސްބުކް ޕޭޖަކުން ސްކޭމެއް ހިންގަމުން އަންނާތީ އެކަމަށް ސަމާލުވާން އެމްޓީސީސީން މިއަދު އެދިއްޖެ އެވެ.

އެމްޓީސީސީން ބުނީ އާރްޓީއެލް މެދުވެރިކޮށް ތިން މަސް ވަންދެން ހިލޭ ދަތުރު ކުރުމަށް މަގުފަހިކޮށްދޭނެ ކަމަށް ބުނާ "ސްމާޓް ކާޑެއް" ވިއްކުމުގެ މަސައްކަތް އެ ޕޭޖުން ދަނީ ކުރަމުން ކަމަށާއި ނަމަވެސް އެ ހަރަކާތަކީ އެމްޓީސީސީ އާއި ރާއްޖެ ޓްރާންސްޕޯޓް ލިންކާއި އެއްވެސް ގުޅުމެއް ނެތް ހަރަކާތްތަކެއް ކަމަށެވެ.

އެމްޓީސީސީގެ ފަރާތުން އައު ހިދުމަތެއް ނުވަތަ ޕްރޮޑަކްޓެއް ތައާރަފު ކުރާނަމަ، އެކަމެއް ރަސްމީކޮށް ފެށުމުގެ ކުރިން އެ ކުންފުނީގެ އޮފިޝަލް ސޯޝަލް މީޑިއާ އަދި އެހެނިހެން މީޑިއާ ޗެނަލްތަކުން އެކަމުގެ މައުލޫމާތު ހިއްސާކުރާނެ އެވެ.

އެހެންކަމުން މިފަދަ ސްކޭމްތައް އާންމުވެފައިވާއިރު މި ކަންކަމަށް ސަމާލުވުމުގެ ގޮތުން އެމްޓީސީސީ ނުވަތަ އާރްޓީއެލްގެ ނަމުގައި އެއްވެސް ފަރާތަކުން ފޮނުވާ ލިންކްތަކަށް ސަމާލުވުމަށާއި، އެފަދަ ފަރާތްތަކާ އެކު އެއްވެސް ފައިސާގެ މުއާމަލާތެއް ނުކުރުމަށް އެ ކުންފުނިން ވަނީ ކަސްޓަމަރުންނަށް ނަސޭހަތްތެރިވެފަ އެވެ.

"މޯލްޑިވްސް ޕަބްލިކް ޓްރާންސްޕޯޓް" ނަމުގައި ފޭސްބުކްގައި ހިންގަމުންދާ ޕޭޖު ރިޕޯޓްކޮށް، މި ޕޭޖުން ހިންގާ އެއްވެސް ހަރަކާތެއްގައި ބައިވެރިނުވުމަށާއި، މި ޕޭޖުން ފޮނުވާފައިވާ އެއްވެސް ލިންކެއް ބޭނުން ނުކުރުމަށް ސަމާލުވުމަށް އެންމެހާ ކަސްޓަމަރުނަށް އިލްތިމާސްކުރަން،" އެމްޓީސީސީން ބުންޏެވެ.

އެމްޓީސީސީން ވަނީ އެ ކުންފުންޏަށް ރައްޔިތުން ކުރާ އިތުބާރުގެ ބޭނުން ނަހަމަ ގޮތުގައި ހިފައި، ނުހައްގުން ފައިސާ ހޯދުމަށް ކުރާ އެ ފަދަ ނާތަހުޒީބު އަމަލުތައް ހަރުކަށި އިބާރާތުން ކުއްވެރިކޮށްފަ އެވެ. އަދި އެ ފަދަ އަމަލުތަކުގެ ސަބަބުން ރާއްޖޭގެ އިގުތިސޯދަށް އިޔާދަ ނުކުރެވޭނެ ފަދަ ބޮޑު ގެއްލުން ކުރިމަތިވެދާނެކަން އެމްޓީސީސީން ފާހަގަކޮށްފައިވެ އެވެ.