ލޭ ހަދިޔާކުރުމާއި ހޭލުންތެރިކަމުގެ ޕްރޮގްރާމް ހިންގަން އެއްބަސްވުމެއް

ލޭ ހަދިޔާކުރުމާއި ހޭލުންތެރި ކުރުމުގެ ޕްރޮގްރާމްތައް ހިންގުމަށް ދަރިވަރުންގެ ޖަމުއިއްޔާތަކާ އެކު އެއްބަސްވުމެއްގައި ސޮއިކޮށްފި އެވެ.

ދުނިޔޭގެ ލޭ ހަދިޔާކުރާ މީހުންގެ ދުވަހާއި ގުޅިގެން ހެލްތު މިނިސްޓްރީ އާއި ކޮލެޖު/ ޔުނިވާސިޓީތަކާ އެކު މިއަދު ބޭއްވި ރަސްމިއްޔާތެއްގައި ހެލްތް މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ ހެޕްތް މިނިސްޓަރު އަބްދުﷲ ނާޒިމް އިބްރާހިމެވެ.

މި އެއްބަސްވުމުގައި ދިވެހިރާއްޖޭގެ ގައުމީ ޔުނިވާސިޓީގެ ފަރާތުން ސޮއިކުރެއްވީ ދަރިވަރުންގެ ޔޫނިއަންގެ ރައީސް އިބްރާހިމް މިޝަލް މޫސާ، ދިވެހިރާއްޖޭގެ އިސްލާމީ ޔުނިވާސިޓީގެ ފަރާތުން ސޮއިކުރެއްވީ ދަރިވަރުންގެ ގުޅުމުގެ ރައީސް ހުސައިން އަރުބާން ފައްވާޒު އެވެ.

ވިލާ ކޮލެޖު ސްޓޫޑަންޓް އެސޯސިއޭޝަނުގެ ފަރާތުން ސޮއިކުރެއްވީ ރައީސް ހުސައިން ޖުނާން، މޯލްޑިވްސް ބިޒްނަސް ސްކޫލްގެ ފަރާތުން ސޮއިކުރެއްވީ ކޮމިއުނިޓީ އެންގޭޖްމަންޓްގެ ސްޕެޝަލިސްޓް ރައްޔާން އަބުދުލްރަހީމް، އެވެ.

އަދި ޒިކްރާ އިންޓަނޭޝަނަލް ކޮލެޖްގެ ފަރާތުން ސޮއިކުރެއްވީ ޑީން އޮފް ފެކަލްޓީ އޮފް ސައިންސް އެންޑް ހިއުމަނިޓިސް އާމިނަތު ޒޫޝާން ހުސައިން، އައިލެންޑް އިންސްޓިޓިއުޓް އޮފް ޓާޝަރީ އެޑިއުކޭޝަންގެ ފަރާތުން ސޮއިކުރެއްވީ ސީއިއޯ އާދިލް ރަޝީދު އެވެ.

މިއެއްބަސްވުމުގައި މައިގަނޑު ފަސް ކަމެއް ހިމެނެ އެވެ.

އޭގެ ތެރޭގައި ހޭލުންތެރިކަން އިތުރު ކުރުމުގެ ކެމްޕޭންތަކާއި،އުނގަންނައިދިނުމުގެ ތެރެއިންނާއި، އާންމުންގެ އެއްބާރުލުން ހޯދައިގެން ހިލޭސާބަހަށް ލޭ ހަދިޔާ ކުރުމަށް އެހީތެރިވެ، އެކަން ކުރިއެރުވުމަށް މަސައްކަތް ކުރުމާއި، މުޖުތަމައުގެ އެހެން ފަރާތްތައް ގަވާއިދުން ހިލޭސާބަހަށް ލޭ ހަދިޔާކުރާ ބަޔަކަށް ހެދުމަށް ހިތްވަރުދިނުމާއި ލޭ ހަދިޔާ ކުރުމުގެ މަސައްކަތްތައް ހަރުދަނާ ކުރުމަށް ގައުމީ އިދާރާތަކާއި ކަމާގުޅޭ ޖަމުއިއްޔާތަކާ އެކު މަސައްކަތް ކުރުން ހިމެނެ އެވެ.

އަދި ފުރާނަ ސަލާމަތް ކުރުމަށް ކުރާ މަސައްކަތުގައި ހިލޭސާބަހަށް ލޭ ހަދިޔާކުރާ މީހުންގެ އަގުވަޒަންކުރުން ވެސް ހިމެނެ އެވެ.

މީގެ އިތުރުން ލޭ ބޭނުންވާ އެންމެންނަށް ރައްކާތެރި، އިތުބާރުހުރި އަދި އެކަށީގެންވާ މިންވަރަށް ލޭ ލިބޭކަން ކަށަވަރު ކުރުމަށް އެކި ދާއިރާތަކާއި މުއައްސަސާތަކާ އެކު މަސައްކަތް ކުރުމަށް ވެސް އެއްބަސްވެފައިވެ އެވެ.

ކޮންމެ އަހަރެއްގެ ޖޫން މަހުގެ 14 ވަނަ ދުވަސް ފާހަގަ ކުރަނީ ދުނިޔޭގެ ލޭ ހަދިޔާކުރާ މީހުންގެ ދުވަހުގެ ގޮތުގަ އެވެ.

މި ދުވަހާއި ގުޅިގެން މިއަހަރަށް ކަނޑައަޅާފައިވާ ޝިއަރަކީ ލޭދީގެން އުއްމީދެއް ދޭށެވެ. އެންމެން ގުޅިގެން ފުރާނަ ސަލާމަތް ކުރަމެވެ.