އިޒުރޭލުން ހިންގާ ޖަރީމާތައް ވަގުތުން ހުއްޓާލަން ދިވެހި ސަރުކާރުން ގޮވާލައިފި

އިސްރާއީލުން އީރާންއަށް ދިން ހަމަލާ ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފި އެވެ.

ރާއްޖޭގެ ފޮރިން މިނިސްޓްރީން ނެރުނު ބަޔާނުގައި ބުނީ އިސްރާއީލުން ބައިނަލްއަގުވާމީ ގާނޫނާ ހިލާފަށް އީރާނަށް ހަމަލާ ދިނުމަކީ މެދުއިރުމަތީގެ ސުލްހައާއި، ސަލާމަތަށް ހުށަހެޅިގެންދާ ނުރައްކަލެއް ކަމަށާއި ހަމަލާތަކުގެ ސަބަބުން އެ ސަރަހައްދުގެ ސަލާމަތަށް ވެސް އިތުރަށް ނުރައްކާވާނެ ކަމަށެވެ.

"އިސްރާއީލުގެ އިސްތިއުމާރީ ބާރުތަކުން ގާޒާއަށް މެދުކެނޑުމެއްނެތި ދެމުންގެންދާ ހަމަލާތަކާ ދިމާކޮށް އީރާނަށް ދިން އެ ހަމަލާ އާ ގުޅިގެން މުޅި މެދުއިރުމަތީގެ ސަލާމަތާއި ރައްކާތެރިކަމަށް މީގެ ސަބަބުން އަސަރުފޯރާނެ،" މިނިސްޓްރީގެ ބަޔާނުގައިވެ އެވެ.

ފޮރިން މިނިސްޓްރީން ބައިނަލްއަގުވާމީ މުޖުތަމައުއަށް ގޮވާލާފައިވަނީ އިސްރާއީލުން ހިންގަމުންދާ ގައިރު ގާނޫނީ އަމަލުތައް ވަގުތުން ހުއްޓާލުމަށް އިސްރާއީލަށް މަޖުބޫރުކޮށް، މިހާރުން މިހާރަށް އަޅަންޖެހޭ ފިޔަވަޅު އެޅުމަށް ބާރުއެޅުމަށާއި، ސަރަހައްދުގެ މަސްލަހަތު އިތުރަށް ގޯސްވިޔަނުދިނުމަށް އަވަސް ފިޔަވަޅުތައް އެޅުމަށެވެ.

އިޒުރޭލުން އީރާނުގެ ނިއުކްލިއަ މަރުކަޒުތަކާއި، އަސްކަރީ މަރުކަޒުތަކަށް ދިން ނުރައްކާތެރި ހަމަލާ ރައީސް ޑރ. މުޙައްމަދު މުއިއްޒު ވެސް ވަނީ ހަރުކަށި އިބާރާތުން ކުށްވެރި ކުރައްވައިފަ އެވެ.

އިސްރާއީލުން ރޭ ވަނީ އީރާނުގެ އަށް ސަރަހައްދަކަށް، މުޅިއެކު ފަސް ފަހަރެއްގެ މަތިން ހަމަލާ ދީފަ އެވެ.

ޔަހޫދީންގެ މި ހަމަލާތަކުގައި އީރާންގެ އަސްކަރިއްޔާގެ ވެރިޔާ، މޭޖާ ޖެނެރަލް މުޙައްމަދު ބާގިރީ އާއި އައިއާރުޖީސީގެ އިސް ކޮމާންޑާ ޖެނެރަލް ހުސައިން ސަލާމީ އާއި އެ ގައުމުގެ އަސްކަރިއްޔާގެ މައި މަރުކަޒުގެ ވެރިޔާ ޖެނެރަލް ގުލާމް އަލީ ރަޝީދު މަރާލާފައިވެ އެވެ.