ހައްޖުވެރިން ފުރަތަމަ ފަހަރަށް ހައި ސްޕީޑް ރޭލުގައި މަދީނާއަށް!

ހައްޖުވެރިން ހައި ސްޕީޑު ރޭލަށް އަރަނީ: ފޮޓޯ/ އިސްލާމިކް މިނިސްޓްރީ

ހައްޖާއި ގުޅޭ އެންމެހާ އަޅުކަންތައް ފުރިހަމަ ކުރުމަށްފަހު ދިވެހި ހައްޖުވެރިންގެ ފުރަތަމަ ގުރޫޕު މިއަދު މަދީނާއަށް ފުރައިފި އެވެ.

ދިވެހި ހައްޖުވެރިން މަދީނާއަށް ކުރާ ދަތުރު މިފަހަރު ކުރުމަށް ހަމަޖެހިފައިވަނީ ހައި ސްޕީޑު ރޭލުގަ އެވެ.

މީގެ ކުރިން ބަހުގައި ކުރަމުން އައި ހަ ގަޑިއިރާއި އަށް ގަޑިއިރުގެ ދަތުރުގެ ބަދަލުގައި 2 ގަޑިއިރުން މަދީނާއަށް ދެވޭ ރޭލުގައި މި ދަތުރުކުރާ ގޮތަށް ހަމަޖެއްސެވީ ރައީސުލްޖުމުހޫރިއްޔާ ޑރ. މުހައްމަދު މުއިއްޒުއެވެ.

މިއީ ހައްޖުވެރިންގެ ކަންކަން ލުއިފަސޭހަ ކުރުމަށް ސަރުކާރުން ކުރަމުންދާ މަސައްކަތުގެ ދަށުން ބަދަލު ކުރެވިގެންދިޔަ ކަމެކެވެ.

ދިވެހި ހައްޖުވެރިން މަދީނާއަށް ދިއުމަށް ހަމަޖެހިފައިވަނީ 4 ގުރޫޕަކަށް ބަހާލައިގެންނެވެ. ހައްޖުވެރިން ރާއްޖެއަށް އެނބުރި އައުމަށް ފުރާނީ މަދީނާއިންނެވެ.

އެގޮތުން ހައްޖުވެރިން އެނބުރި އައުމަށް ހަމަޖެހިފައިވަނީ މި މަހުގެ 13، 14، 16 އަދި 17 ވަނަ ދުވަހު އެވެ.

އިސްލާމިކް މިނިސްޓްރީ