ހައްޖުގެ އަޅުކަމަށްފަހު ރައީސްގެ ދެކަނބަލުން ފުރާވަޑައިގެންފި

މި އަހަރުގެ ހައްޖުގެ އަޅުކަން އަދާކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދެކަނބަލުން ސައުދީ އަރަބިއްޔާއަށް ކުރެއްވި ދަތުރުފުޅު ނިންމަވާލައްވައިފި އެވެ.

ރައީސް އޮފީހުން ބުނީ ރައީސްގެ ދެކަނބަލުންނަށް އަލްވަދާއު ވިދާޅުވީ ޖިއްދާގެ ގަވަރުނަރު ޕްރިންސް ސައުދު ބިން އަބްދުﷲ ބިން ޖަލާވީ އަލް ސައުދު، ކަމަށެވެ.

ރައީސްގެ މި ދަތުރުފުޅުގައި ސައުދީ އަރަބިއްޔާގެ ވަލީއަހްދު އަދި ބޮޑުވަޒީރު މުޙައްމަދު ބިން ސަލްމާން ބިން އަބްދުލްއަޒީޒް އާލް ސުއުދާ ބައްދަލުކުރެއްވި އެވެ.

އަލް-މިނާ ޕެލަސްގައި ބޭއްވި މި ބައްދަލުކުރެއްވުމުގައި ރައީސް ވަނީ، ސައުދީ ސަރުކާރުން ދެމުން އަންނަ މެހުމާންދާރީގެ އިތުރުން އެއްބާރުލުމަށް ޓަކައި އަދި އެންމެހައި ހައްޖާޖީންނަށް ފޯރުކޮށްދިން ފުރިހަމަ ހިދުމަތް ފާހަގަ ކުރައްވާ، މާތްވެގެންވާ ދެ ހަރަމްފުޅުގެ ހާދިމް އަދި ސައުދީ ރަސްގެފާނު ކިންގް ސަލްމާން ބިން އަބްދުލްއަޒީޒް އާލް ސުއޫދަށާއި ވަލީއަހްދަށް، ނިހާޔަތަށް ޝުކުރު އަދާ ކުރައްވާފަ އެވެ.

އަދި ރާއްޖެ އާއި ސައުދީއާ، ދެމެދު ގުޅުން ބަދަހިކުރުމާ ގުޅޭ ގޮތުން މި ބައްދަލުކުރެއްވުމުގައި ދެ ބޭފުޅުން މަޝްވަރާ ކުރެއްވި އެވެ. އެގޮތުން ދެ ގައުމުގެ މެދުގައި އޮންނަ އުހުއްވަތްތެރި ގުޅުން، ދެ ގައުމަށް ވެސް ފައިދާ ކުރާނޭހެން ބަދަހި ކުރުމަށް ކުރެވިދާނޭ ކަންތައްތަކާ މެދު ދެ ބޭފުޅުން ހިޔާލު ބަދަލު ކުރެއްވި އެވެ.

މި ދަތުރުފުޅުގައި ސައުދީގެ މިނިސްޓާ އޮފް ހައްޖު އެންޑް އުމްރާ، ޑރ. ތައުފީގު ބިން ފައުޒާން އައްރަބީއާ ވަނީ ރައީސްގެ އަރިހަށް އިހުތިރާމްގެ ޒިޔާރަތެއް ކުރައްވާފަ އެވެ. އޭގެ އިތުރުން ދިވެހި ހައްޖާޖީންނާ ވެސް ރައީސް ބައްދަލުކުރެއްވި އެވެ.