ދުނިޔޭގެ ދުޅަހެޔޮކަން ފެށެނީ ކަނޑުތަކުގެ ދުޅަހެޔޮކަމުން: ރައީސް

ރައީސް ޑރ. މުޙައްމަދު މުއިއްޒު --

ދުނިޔޭގެ ދުޅަހެޔޮކަން ފެށެނީ އަޅުގަނޑުމެންގެ ކަނޑުތަކުގެ ދުޅަހެޔޮކަމުން ކަމުގައި ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

މިއަދު ފާހަގަކުރާ ދުނިޔޭގެ ކަނޑުތަކުގެ ދުވަހުގެ މުނާސަބަތުގައި ކުރެއްވި އެކްސް ޕޯސްޓެއްގައި ދުނިޔޭގެ ދުޅަހެޔޮކަން ފެށެނީ ކަނޑުތަކުގެ ދުޅަހެޔޮކަމުންކަން ފާހަގަ ކުރައްވާ ރައީސް ވިދާޅުވީ ރާއްޖެ ފަދަ ޖަޒީރާ ގައުމުތަކަށް، ކަނޑަކީ ހަމައެކަނި ވަސީލަތެއް ނޫން ކަމަށާއި އެއީ އަޅުގަނޑުމެންގެ ދިރިއުޅުމުގެ މައިގަނޑު ބައެއް ކަމަށެވެ.

"ކަނޑަކީ ހަމައެކަނި ވަސީލަތެއް ނޫން، އެއީ އަޅުގަނޑުމެންގެ ދިރިއުޅުމުގެ މައިގަނޑު ބައެއް، މަސްވެރިކަމާއި، ފަތުރުވެރިކަމާއި އަދި އެހެނިހެން ގޮތްގޮތުން އަޅުގަނޑުމެން ދިރިތިބުމަށް އެހީތެރިވެދޭ،" ރައީސް ވިދާޅުވި އެވެ.

ރައީސް ވިދާޅުވީ ނަމަވެސް މޫސުމަށް އަންނަ ބަދަލުތަކުގެ ސަބަބުން ކަނޑުތައް ހޫނުވަމުން ގޮސް، މަސްތަކުގެ ސްޓޮކަށް ބަދަލު އައިސް، ގޮނޑުދޮށްތައް ގިރަމުންދާ ކަމަށެވެ.

"މި ދުނިޔޭގެ ކަނޑުތަކުގެ ދުވަހުގައި، އަޅުގަނޑުމެން އެންމެންނަށް ދިރިތިބުމަށް އެހީތެރިވެދޭ ކަނޑު ދެނެގަތުމަށާއި، އިހުތިރާމު ކުރުމަށާއި އަދި ރައްކާތެރި ކުރުމަށް އަޅުގަނޑުމެންގެ އަޒުމް އައު ކުރަމާ ހިންގަވާށެވެ،" ރައީސްގެ ޕޯސްޓުގައި ވިދާޅުވެފައިވެ އެވެ.

ރައީސް ޑރ މުޢިއްޒު