ލ.ލިންކު ރޯޑުގައި ނުރައްކާތެރި އެކްސިޑެންޓެއް ހިނގައި ދެމީހަކަށް ސީރިއަސް އަނިޔާތަކެއް

ލިންކު ރޯޑުގައި ރޭ ހިނގި އެކްސިޑެންޓުގައި އަނިޔާވި މީހުން ދުއްވި ސައިކަލް: ފޮޓޯ/ޕޮލިސް

ލ. ލިންކު ރޯޑުގައި ހިނގި ނުރައްކާތެރި އެކްސިޑެންޓެއްގައި ދެމީހަކަށް ސީރިއަސް އަނިޔާތަކެއް ވެއްޖެ އެވެ.

މީޑިއާތަކާ ހިއްސާ ކުރި މެސެޖެއްގައި ފުލުހުން ބުނީ ލ. ލިންކު ރޯޑުގައި އުތުރުން ދެކުނަށް ދުއްވާފައިދިޔަ ސައިކަލަކާއި ކާރެއް ޖެހި އެކްސިޑެންޓުވެފައިވާ މައްސަލައެއް ރޭގެ 7:03ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.

މި އެކްސިޑެންޓުގައި ސައިކަލުގައި ތިބި ދެމީހުންނަށް އެކިވަރުގެ އަނިޔާވެފައިވެ އެވެ.

އެގޮތުން ސައިކަލް ދުއްވަން އިން އުމުރުން 44 އަހަރުގެ ދިވެހި ފިރިހެން މީހާގެ ކަނާތު ފައިގެ ދެ ތަނަކުން ބިނދި، ބޯ ފެޅި އިތުރު އަނިޔާވެފައިވާ ކަމަށާއި އަދި ފަހަތުގައި އިން 44 އަހަރުގެ ދިވެހި ފިރިހެން މީހާގެ ބޯ ދެ ތަނަކުން ފެޅި، ކަނާތު ފައި ދެ ތަނަކުން ބިނދި އޭނާއަށް ވެސް އިތުރު އަނިޔާވެފައިވާ ކަމަށް ފުލުހުން ބުންޏެވެ.

މި އެކްސިޑެންޓުގައި ހިމެނޭ ކާރު ދުއްވި 62 އަހަރުގެ ދިވެހި ފިރިހެންމީހާއަށް އަނިޔާވެފައި ނުވި ނަމަވެސް، އެކްސިޑެންޓުގައި ދެ އުޅަނދަށް ވެސް އެކި ވަރުގެ ގެއްލުންވެފައި ކަމަށް ފުލުހުން ބުނެފައިވެ އެވެ.

ފުލުހުން އަންނަނީ މި އެކްސިޑެންޓުގެ މައްސަލަ އިތުރަށް ތަހުގީގު ކުރަމުންނެވެ.

ފުލުހުން ލާމު ލިންކު ރޯޑު އެކްސިޑެންޓް