ކޮންމެ އީދަކީ ވެސް އުފާވެރި ހަނދާންތަކެއްގެ ބިންވަޅު ނެގޭ، ބަރަކާތްތެރި މުނާސަބަތަކަށް ހެދުމަށް ރައީސް އިލްތިމާސްކުރައްވައިފި

ކޮންމެ އީދަކީވެސް އުފާވެރި ހަނދާންތަކެއް، އެންމެންގެ ހިތްތަކުގައި ބިންވަޅު ނެގޭ ބަރަކާތްތެރި އިހުތިފާލަކަށް ހެދުމަށް ރައީސް ޑރ. މުޙައްމަދު މުއިއްޒު، އިލްތިމާސް ކުރައްވައިފި އެވެ.

އީދު ދުވަހުގެ މުނާސަބަތުގައި ރައީސް ފޮނުއްވި ހިތޯބުގައި ވަނީ، ބަރަކާތްތެރި ކޮންމެ މޫސުމެއްގައި ވެސް އިޖުތިމާއީ ރޫހާއި އެއްބައިވަންތަކަން އާލާ ކުރުމަށް ހާއްސަ އިސްކަމެއް ދިނުމަށް ބާރު އަޅުއްވާފަ އެވެ.

"ދޮށީ އުމުރުގައި ތިބި މައިންބަފައިން އުފާކޮށްދިނުމާ، އަވަށްޓެރި ކަމުގެ ގުޅުންތައް ދެމެހެއްޓުމާ، ގާތްތިމާގެކަމާ ރަހުމަތްތެރިކަން އިތުރަށް ބަދަހި ކުރުމާ، ދަރީންނަށް ރިވެތި ނަމޫނާއާ ނަސޭހަތްތަކުން ތަސައްލީ ލިބިދިނުމަކީ، އީދުގެ ހަގީގީ ޒީނަތްތެރިކަމެވެ." އެމަނިކުފާނުގެ ހިތޯބުގައި ވިދާޅުވެފައިވެ އެވެ.

ރައީސްގެ ހިތޯބުގައި އެ މަނިކުފާނު ވަނީ ދިވެހީންގެ ހިތްތަކުގައި ފަލަސްތީނަށް އޮތް ލޯތްބާއި، ކުލުނު ފާހަގަ ކުރައްވާފަ އެވެ. އަދި އެމަނިކުފާނު ވަނީ ފަލަސްތީނުގެ މުސްލިމުން ކުރާ ޖިހާދުގައި ބަރަކާތް ލެއްވުމަށް އެދިވަޑައިގެން ދުއާ ދަންނަވާފަ އެވެ.

ހަމަ އެއާއެކު، އެއް މުއުމިނަކު އަނެއް މުއުމިނަކަށް އަޅައިލާ އެހީތެރިކަން ދިނުމުން އުފެދޭ ބަދަހި ގުޅުން ކީރިތި ރަސޫލު މުޙައްމަދު ސައްލަﷲ އަލައިހި ވަސައްލަމް، ސިފަ ކުރައްވާފައިވަނީ، ގަދަފަދަ ބިނާއެއްގެ ގޮތުގައިކަން އެ މަނިކުފާނުގެ ހތޯބުގައި ފާހަގަ ކުރައްވާފައިވެ އެވެ.

ރައީސްގެ ހިތޯބު ނިންމަވާލައްވާފައި ވަނީ ދިވެހި ރައްޔިތުންނަށް މިއަހަރުގެ ބޮޑު އީދަކީ، އަމާންކަމާއި، ބާއްޖަވެރިކަމުން ފުރިގެންވާ މުނާސަބާއެއް ކަމުގައި ލެއްވުން އެދިވަޑައިގެން ދުއާ ދަންނަވަމުންނެވެ.