ފަތިސްވުމުގެ ކުރިން ހުރިހާ ހައްޖުވެރީންނަށް އަރަފާތަށް ވަދެވޭނެ: ޝަކީލް

މި އަހަރު ރާއްޖެއިން ހައްޖަށް ދިޔަ ހުރިހާ ހައްޖުވެރީން މިހާރު ތިބީ މައްކާ ޓެންޓުތަކުގައި ކަމަށް ހައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވެއްޖެ އެވެ.

ހައްޖު ކޯޕަރޭޝަންގެ ހަވާލުގައި މިފަހަރު ހައްޖުގެ މަތިވެރި އަޅުކަން އަދާ ކުރުމަށް ސައުދީއަށް ދިޔަ 1000 ހައްޖުވެރީން މިހާރު ތިބީ މައްކާގަ އެވެ.

ހައްޖުވެރީން އަރަފާތަށް ދިއުމަށް ފުރުމަށް ހަމަޖެހިފައި ވަނީ މިރޭގެ ވަގުތެއްގަ އެވެ. އަރަފާތަށް ދިޔުމަށްފަހު ހައްޖުވެރީން މުޒްދަލިފާގައި ރޭ ކުރާނެ އެވެ. މުޒްދަލިފާގައި ރޭކުރުމަށްފަހު ބޮޑުޖަމްރާއަށް ހިލައުކުން ކުރިއަށް ގެންދިޔުމަށްފަހު ދެން އޮންނާނީ ހަދްޔު ކަތިލުމެވެ.

މައްކާގައި ހުންނަވާ، ޝަކީލް މީޑިއާތަކާ ހިއްސާކުރެއްވި މެސެޖުގައި ވިދާޅުވީ ހުރިހާ ހައްޖުވެރީން މިހާރު ތިބީ މައްކާގެ ޓެންޓުތަކުގައި ކަމަށެވެ. އަދި ހައްޖުވެރީންގެ ހާލު ރަނގަޅު ކަމަށާއި އިޝާނަމާދަށް ފަހު މިނާ ތެރެއަށް ބަސްތައް ވަނުމުގެ ހުއްދަ ލިބުމާއެކު ހައްޖު ކޯޕަރޭޝަންގެ ބަސްތައްވެސް މިނާ ތެރެއަށް ވަންނާނެ ކަމަށް އޭނާ ވިދާޅުވި އެވެ.

"އުއްމީދާއެކު މަސައްކަތް މި ކުރަނީ މިރޭ ފަތިސްވުމުގެ ކުރިން ހުރިހާ ހައްޖުވެރީން އަރަފާތަށް ވަދެ ނިންމާލެވޭނެ ކަމަށް، އަރަފާތުގައި ހައްޖުވެރީން ތިބެން ހަމަޖެހިފައިވާ ޓެންޓުތައް ވަނީ ނިމިފައި، އަދި މިނާއެކޭ އެއްގޮތަށް އަރަފާތުގައި ވެސް ކެއުމުގެ އިންތިޒާމް ހަމަޖައްސާފައިވަނީ ބުފޭ،" ޝަކީލް ވިދާޅުވި އެވެ.

ހައްޖުގެ އަޅުކަމަކީ ކުޅަދާނަވެގެންވާ ކޮންމެ މުސްލިކަމަށް އުމުރުން އެއް ފަހަރު ކުރުން ފަރުޟުވެގެންވާ އަޅުކަމެކެވެ.

މި އަހަރުގެ ހައްޖު ދުވަހަކީ ޖޫން 5 ވާ ބުރާސްފަތި ދުވަހެވެ