މާފުށީ ޖަލުގައި ފުރަތަމަ ފަހަރަށް ގައިދީނަށް ހާއްސަކޮށްގެން ފުޓްސަލް މުބާރާތެއް ބާއްވައިފި

މާފުށީ ޖަލުގައި ފުރަތަމަ ފަހަރަށް ގައިދީނަށް ހާއްސަކޮށްގެން ފުޓްސަލް މުބާރާތެއް ބާއްވައިފި އެވެ.

ކަރެކްޝަނުން ބުނީ "އިންމޭޓްސް ފުޓްސަލް ޓޯނަމަންޓް"ގެ ނަމުގައި ބޭއްވި މި މުބާރާތަކީ ގައިދީންގެ ދުޅަހެޔޮ ސިއްހަތެއްގައި ބޭއްތިއްބުމަށާއި، ކުޅިވަރުގެ ތެރެއިން ގައިދީން ރިހެބިލިޓޭޓު ކުރުމަށް ރާވައިގެން ހިންގާ ޕޮރޮގްރާމްތަކާ ގުޅުވައިގެން ބޭއްވި މުބާރާތެއް ކަމަށެވެ.

އެ ގޮތުން މި މުބާރާތުގެ ފައިނަލް މެޗަށްފަހު، ފެއާ ޕްލޭ ޓީމަށް ހޮވުނު ޓީމާއެކު ދައުލަތުގެ ވަޒީރުންނާއި އިސްބޭފުޅުން ހިމެނޭ ގޮތަށް ފޯރިގަދަ މެޗެއް ކުޅެފައިވެ އެވެ. މިއީވެސް ދިވެހި ތާރީހުގައި އަލަށް ކުރެވިފައިވާ ކަމެކެވެ.

މި މެޗުގައި ބައިވެރިވި ވަޒީރުންނާއި އިސް ބޭފުޅުންނަކީ:

1. އެޓާނީ ޖެނެރަލް އަލްއުސްތާޒު އަހުމަދު އުޝާމް

2. ހޯމް މިނިސްޓަރު އަލީ އިހުސާން

3. އިކޮނޮމިކް މިނިސްޓަރު މުޙައްމަދު ސައީދު

4. ފިޝަރީޒް މިނިސްޓަރު އަހުމަދު ޝިޔާމް

5. ހެލްތް މިނިސްޓަރު އަބްދުﷲ ނާޒިމް

6. ރައީސް އޮފީހުގެ ޗީފް އޮފް ސްޓާފް އަބްދުﷲ ފަޔާޒު

7. ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ކެބިނެޓް އެފެއާޒް އަހުމަދު އަލީ ހަބީބް

8. ދަރުމަވަންތަ ހޮސްޕިޓަލުގެ ސީއީއޯ އިބްރާހީމް އަބްދުއްރައްޒާގު ހަލީމް

މީގެ އިތުރުން މި އިވެންޓްގައި ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާ އާއި ކޮންޓްރޯލާ ޖެނެރަލް އޮފް އިމިގްރޭޝަން ކޮމިޝަނާ އޮފް ޕޮލިސް (ރިޓަޔާޑް) އަހުމަދު ފަސީހު އާއި ކޮމިޝަނަރ އޮފް ޕްރިޒަންސް ޙަސަން ޒަރީރު ބައިވެރިވެޑައިގެންނެވި އެވެ.

 ގާތްގަނޑަކަށް ދެ ހަފްތާއަށް ދެމިގެންދިޔަ މި މުބާރާތުގައި ވަނަތަކަށް ހޮވުނު ޓީމުތަކަށާއި ކުޅުންތެރިންނަށް ގިނަ އަދަދެއްގެ އިނާމް ދީފައިވެ އެވެ. އަދި ފައިނަލް މެޗު ބައްލާލުމަށް ޓަކައި، ބައެއް ގައިދީންގެ އާއިލާތަކުން ވެސް ޒިޔާރަތް ކޮށްފައިވެ އެވެ.