ދިވެހި ހުރިހާ ހައްޖުވެރީންނަށް މިނާއަށް ދެވިއްޖެ

ދިވެހި ހައްޖުވެރީން: ފޮޓޯ/ އިސްލާމިކް މިނިސްޓްރީ

މި އަހަރު ރާއްޖެއިން ހައްޖަށް ދިޔަ ހައްޖުވެރީން މިނާއަށް ހިނގައްޖެ އެވެ. މިނާއަށް ހައްޖުވެރީން ދަތުރު ފެށީ ރޭގެ ވަގުތެއްގަ އެވެ.

ރާއްޖެއިން މިއަހަރު ޖުމުލަ 1000 ހައްޖުވެރީން ހައްޖުގެ އަޅުކަން ފުރިހަމަކުރާއިރު ހުރިހާ ހައްޖުވެރީންގެ ހާލުވެސް ރަނގަޅު ކަމަށް ރާއްޖޭގެ ހައްޖު މިޝަނުން މައުލޫމާތުދެ އެވެ.

ހައްޖުވެރީން މިނާއިން، ދެން ދާނީ ހައްޖުގެ އެންމެ މުހިންމު ރުކުން އަދާ ކުރުމަށް އަރަފާތަށް ދިއުމަށެވެ. ހައްޖު މަހުގެ ނުވަ ވަނަ ދުވަހުގެ މެންދުރުފަހުން އަރަފާތުގައި މަޑު ކުރުމަކީ ހައްޖުގެ އެންމެ މުހިންމު ރުކުނެވެ. އެ ބިމަށް އެދުވަހު އިރުއޮއްސުމުގެ ކުރިން ނުދެވޭ މީހުންނަށް ހައްޖު ނުލިބޭނެ އެވެ.

ހައްޖުވެރީން އަރަފާތަށް ދިއުމަށް ފުރުމަށް ހަމަޖެހިފައި ވަނީ މިރޭގެ ވަގުތެއްގަ އެވެ. އަރަފާތަށް ދިޔުމަށްފަހު ހައްޖުވެރީން މުޒްދަލިފާގައި ރޭ ކުރާނެ އެވެ. މުޒްދަލިފާގައި ރޭކުރުމަށްފަހު ބޮޑުޖަމްރާއަށް ހިލައުކުން ކުރިއަށް ގެންދިޔުމަށްފަހު ދެން އޮންނާނީ ހަދްޔު ކަތިލުމެވެ.

އެއަށްފަހު މިނާގައި ރޭ ކުރުމަށްފަހު، ތިން ޖަމްރާއަށް ހިލައުކުމަށްފަހު ހައްޖުވެރީން ދެން ދާނީ ތަވާފުލްއިފާޟާކުރުމާއި ސަފާ ފަރުބަދައާއި މަރްވާ ފަރުބަދައާ ދެމެދު ސައުޔުކުރުމަށެވެ. ހައްޖުވެރީންގެ އެންމެ ފަހުކަމެއްގެ ގޮތުގައި ކުރިއަށްގެންދާނީ ވަދާއުގެ ޠަވާފުކޮށް ހައްޖުގެ އަޅުކަން އަދާކޮށް ނިންމުމެވެ.

ހައްޖުގެ އަޅުކަމަކީ ކުޅަދާނަވެގެންވާ ކޮންމެ މުސްލިކަމަށް އުމުރުން އެއް ފަހަރު ކުރުން ފަރުޟުވެގެންވާ އަޅުކަމެކެވެ.

މި އަހަރުގެ ހައްޖުދުވަހަކީ ޖޫން 5 ވާ ބުރާސްފަތި ދުވަހެވެ.

ހައްޖު މިޝަން އިސްލާމިކް މިނިސްޓްރީ ހައްޖުވެރިން